SU-mik aaqqissuusseqqinneq kalaallinik eqquinerlussinnaavoq
Aaqqissuusseqqinnerulli kalaallit Danmarkimi ilinniartut eqqornerlioriaannaavai, ilinniarnerminnik taamaatiinnartariaqalersillugit, isornartorsiuisut oqarput.
SU-mik allanngortiterinerup iliuuseqanngikkutta kalaallit ilinniartut eqqornerlussavai.
Folketingimut ilaasortaq Doris Jakobsen oqarpoq. Annilaangatigaa naggataagut taamaatitiinnartoqartarsinnaanera. Ingammillu ukiup affaanik kinguaattoortut pillugit malittarisassap ernummatigaa.
- Nalunngilarput kalaallit ilinniartut unammilligassaqartartut, ilinniarnerminni oqaasersiat siulliit; qallunaatut kisiisa atornagit aammali oqaasersiat aappaat tuluttut atortarpaat, taamaalillutik kalaallit amerlasuutigut sivisunerulaartumik ilinniakkaminnik naammassinninniaasarlutik. Tassa kalaallit ilinniartut amerlasuut ilinniarnersiut SU annaassallugu ulorianartorsiussapput.
Kalaallit Illuutaanni ilinniartunik siunnersorti Pia Rosing Heilamann aamma ernumavoq.
-Misilittangaraarput ilinniartuutitta amerlasuut piffissap naatsorsuussap iluani ilinniakkaminnik naammassinngitsoortarnerat. Inuusuttut amerlasuut avatangiisinut nutaanut nuunneq artorsaatigisarmassuk. Aamma kulturikkut, ilinniariaatsikkut oqaatsitigullu. Ilinniakkamut tunngasut nakkaatigineq ajorpaat, allanuku ajornartorsiutigisaraat.
Danmarkimi Kalaallit Ilinniangaqartut qassit kinguaattoortarnersut kisitsisaatigineqanngilaq, Pia Rosing Heilmannili isumaqarpoq ilinniartut pingajorarterutaasa missaat Sjællanimi ilinniartut kinguaattoortartut.
Taamaatiinnartoqartarsinnaanera Doris Jakobsen-ip parteeqatiminut naalakkersuisumut Nick Nielsen-imut uparuarsimavaa, isumaqarami Naalakkersuisut kalaallinut ilinniangaqartunut qularnaveeqqusiisariaqartut.
-Isumaqarpunga Naalakkersuisut pisoq iliuuseqarfigisariaqaraat, Danmarkimi ilinniartuutitsinnut kinguneqarnerlussanngippat. Qallunaammi naalaakkersuisut aalajangeereerput. Kalaallit Kalaallit Nunaanniit ikorfartorneqartariaqarput.
Ilinniartut toqqaasinnaatitaanerat kalaallisut qallunaatulluunniit ilinniarnersiuteqassanerlutik januarip aallaqqaataaniit taamaatippoq. Taamanili kalaallit ilinniartut 20-it sinnerlugit ukiullit qallunaat tapiissutaannik pisalerput, inuusunnerusut suli kalaallit nunaanniit tapiiffigineqartut. Qallunaat SU-anik pisarnermik saniatigut kalaallit ilinniartut Kalaallit Nunaanniit ajunngitsorsiaqartinneqartarput soorlu, akeqanngitsumik angalanerit, atuakkanut, nakorsaatinut, tarnip nakorsaanut kigutit nakorsaanullu tapiissutit.