Struerimiut aamma nunarput saqqumilaartinniarpaat
Danmarkimi Roskildemiinnaanngitsoq kalaallit kulturiat qaammammi matumani sammineqarpoq.
Struerimi Folkets Husimi ukiut tamaasa festivalimik aaqqissuussisoqartarpoq - ukiormannalu festivalertitsinissami Nunarput sammineqassaaq.
Inuit ilisarnaataat
Nipilersortussat maajip 15-iani pisussamut aggersarneqartut tallimaapput, tassaasut Rasmus Lyberth, Angu, Julie Berthelsen aamma Pauline Motzfeldt Lumholt kiisalu nunani avannarlermiut Polar Kvintetten. Kingulliit taaneqartut Danmarkimit, Sverigemit aamma Islandimit saxofonertartumillu Benjamin Koppelimit siulersorneqarput.
Festivalimi kalaallit nerisassaataat sassaalliutigineqassapput sanalukkanillu saqqummersitsisoqassalluni.
Aamma kalaallit eqqumiitsuliaat
Sapaatip akunnerata naanerani eqqumiitsulianik saqqummersitsisoqassaaq, taallugu Assit-Isummat, tamatumani kalaallit eqqumiitsuliaat ataqqiniarneqarlutik.
Struerimi Gimsinghoved Kunst- og Kulturcenterip saqqummersitsineq arfininngorpat ammassavaa, saqqummersinneqassallutik Thue Christiansenip eqqumiitsuliai, Rasmus Lyberthip ukkusissamik qiperugai, Lucia Geraaep tupilaliai, Kristine Markussenip marriai aamma Linda Riberip qalipagai.