Strindbergip qalipagaa tillinneqarpoq
Qalipaasup tusaamasap, svenskip atuakkiortup eqqumiitsuliortullu, August Strindbergip, qalipagaa, katersugaasivimmi Sverigimi illoqarfiup Stockholmip qeqqaniittumi, Strindbergip Katersugaasivianit, ippassaq tillinneqarpoq. Sverigimi aviisip ullormut saqqummersartup, Aftonbladet-p nittartagaani tamanna atuarneqarsinnaavoq.
Qalipakkap ”Svartsjukans natt”( ”Unnuaq sangiaffik”-mik nutsersinnaagunakkatta) iikkamiit peerlugu tillinneqarnerata nalaani, katersugaasivimmi sulisut isersimasut arlaannit allamut saasarneqarsimagunartut, katersugaasivimmi pigaartoq aviisimut oqarpoq.
-Tillinniaqataasimagunartut angutit marluk katersugaasivimmi sulisunik allamut saasaarineranni qalipakkamik tillittoq arpaannaq qimaavoq, Stockholmimi politiinut tusagassiorfimmi oqaaseqartartoq, Björn Engström, nutaarsiassaqartitsivimmut TT-mut ippassaq oqarpoq.
Tillinniat pingasut politiinit tigusarineqanngitsuuipput.
Qalipagaq ”Svartsukans natt”, 30x40 centimeterinik angissusilik, Strindbergip Berlinimi 1893-imi qalipassimavaa. Qalipagarlu koruuninik milliuuninik arlalinnik naleqassangatinneqarpoq.
