Avatangiisit Nunanit allanit

Canadami tuttorpassuaqarfinni uumasut nungutaanissaminnut ulorianartorsiortut

Canadap avannarpasissortaani tuttorpassuaqarfinni uumasut nungutaanissaminnut ulorianartorsiortinneqarput. Pinngortitaq pillugu nunarsuaq tamakkerlugu suliniaqatigiiffik WWF nalunaarusiamini kingullermi taama naliliivoq. Can-tech-letter nittartakkami taama allaaserisaqarpoq.
Assi © : Bart/Flickr Creative Commons
Allattoq Mads Lynge
oktobarip 19-at 2016 08:10

Tuttoqatigiiaat ilaat siusinnerusumut naleqqiullutik allaat 98 procentimik ikileriarsimapput, tassalu taakkunannga taamaallaat 2 procentit sinnerupput. Eqqorneqarnerluttut tassaanerupput tuttut Nunavumi Barthurstimiittut aamma Nordwest Territoriesimiittut.

Nunavumi Northwest Territoriesimilu siornatigut 472.000-inik tuttoqarsorineqaraluarpoq, maanna eqqoriarneqarpoq 19.800-innanngorsimasut, 2012-imi allaat 34.700-simagaluartut.

Silap pissusaata allanngoriartornera pisuutinneqarpoq.

Nalunaarusiami erserpoq silap kissanneratigut tatsit immallu sikukinnerulersimasut. Tuttut killeqanngitsumik angalasinnaanerannut siku iluaqutaasimagaluarpoq.

Aammalu upernaakkut siallernerulersimanera pissutigalugu, naasut orsuaasallu tuttut mamarilluagaat qerruttarlersimammata tuttut ikiliartornerannut peqqutaaqataatinneqarput.

 

 

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk