Stockholmimi imminut pilliutigaluni qaartittoq

Tyskit nittartagaanni Spiegelonline-nimit oqaatigineqarpoq taassuma kinaanera ilisimallugu. Taakku oqarput Iraq-imit Sverige-mut nuunnerusoq 28-nik ukiulik, aammalu imminut qaartinnginnermini nittartakkatigut kikkunnut tamanut mianersoqqusisimagaluartoq oqaatigalugu:

Immiussami uani tusaaneqarsinnaavoq qaartartumeerisoq oqartoq, profetip Muhammed titartaasuanut, eqqumiitsuliortumut Lars Wilks-imut, svenskit innuttaat qisuariaateqarsimanngimmata pillarneqassasut aammalu svenskit sakkutuui Afghanistan-imiinnerannut qisuariarsimanngimmata pillagaassasut.

Svenskit isertortumik politiivisa, SÄPO-p suli avammut nalunaarutiginngilaa angutip kinaanera. Aamma suli avammut nalunaarutigineqanngilaq imminut qaartinngilaarnerata nalaani biili qaartinneqarsimasoq.

Isertortumik paasiniaasartut politiit nalunaarutituaraat, imminut qaartinnginnermini politiinut emailikkut allassimasoq ima oqaasertalimmik: - Meeqqasi, panisi qatanngutisilu, uangut qatanngutititut meeqqattitullu qoqussapput.

Angutip imminut qaartinnginnerani nassaarinnginnerannut, SÄPO-kkut pissutissaqarput isumakulunnissaminnut, taama naliliivoq DR-ip Stockholmimi aallartitaa, Claus Buhr:

- Stokcholmip qeqqani imminut pilliutigaluni qaartartumeerineq, Sverige-mi naalagaaffiup isertortumik paasiniaasartuisa annilaagassutaasa annersaannut ilaavoq, ingammik qaartartumeerisoq pinerliinianut ilisimaneqartunut attuumassuteqanngitsoq nalunagu. Isertortumik paasiniaasartut oqaloqatigisakka oqarput, maanna imminnut pisuuteqattaannerit pilersut, tassami qaartartumeerisup iliuuseqalinnginnerani paasineqarsinnaasimagaluartoq oqaatigineqarmat. Q aartartumeerisup Facebookimi imminut ilisaritinnera eqqarsaatigalugu, tassani atuarneqarsinnaavoq, ingasattajaartumik isummersortartuusoq, taamaattumillu politiinit qangali nakkutigineqalersinnaasimagaluartoq, isertortumik paasiniaasartut oqarput.