Stockholmimi imerniartarfiit tallimat matuneqaratarsinnaasut
Stockholmimi imerniartarfiit tallimat coronavirusip siammatsaaliornissaanut maleruaqqusanik unioqqutitsimmata matuneqaratarsinnaapput.
Sverigemi nutaarsiassaqartitsivik SVT taama allappoq.
- Inuit imminnut qanippallaartut amerlavallaaramik, imerniartarfiit iluanni silataannilu, Stockholmimi avatangiisinut ingerlatsivimmi immikkoortortami pisortaq Peter Brådenmark SVT-imut oqarpoq.
Sverigemi imerniartarfiit neriniartarfiillu coronavirusip nalaani matuneqanngillat.
Inuilli imminnut qanillivallaannginnissaat imerniartarfinni neriniartarfinnilu piginnittut isumagissavaat. Taamaaliunngikkunik oqartussat matusinermik naalakkiisinnaapput.
Imerniartarfiit 25-t
Sverigemi illoqarfiit pingaarnersaanni imerniartarfiit 25-it arfininngormat takusarneqarput. Svenskit nutaarsiassaqartitsiviat TT taama allappoq.
Takusarneqartuni qulit oqartussat innersuussutaannik malinninngillat, taakkunanilu tallimat matuneqaratarsinnaallutik.
Imerniartarfiit matuneqassanersut Region Stockholmip tuniluuttoqalernissaanik pinaveersaartitsinermi immikkoortortaqarfiata aalajangissavaa.
- Iliuuseqartariaqarput, namminnerli aalajangissavaat qanoq iliuuseqarniarnerlutik, Miljöpartiemi avatangiisit silallu pissusia pillugit oqaaseqartartoq Katarina Luhr TT-mut oqarpoq.
Nunat allat assiginagit
Sverigemi suliffinnik suli matusisoqarnikuunngilaq.
Sverigep uitsatigineqartumik Europami nunat allat assiginagit nualluut coronavirus akiorpaa. Assersuutigalugu Sverigemi atuarfiit coronap nalaani ammatiinnarneqarput.
Sverigemi coronavirusimik toqquteqartut 2194-iupput. Tassa imaappoq innuttaasut 100.000-iuppata 21-it nualluut toqqutigisarpaat.
Danmarkimi innuttaasut 100.000-iuppata arfineq marluk toqqutigisarpaat.
Sverigemi nualluummik 18.640-rut tunillatsissimapput.