Stig Rømer Winther: Unammilleqatigiinneq attatiinnarneqarli
Unammilleqatigiissinnaanneq killilersorneqassappat suliffiit ingerlalluanngitsut ingerlaannassasut Kalaallit Nunaanni takornariaqartitsinermik inussutissarsiornermullu siunnersuisoqatigiit pisortaat Stig Rømer Winther oqarpoq.
Sulisitsisut peqatigiiffiata NUSUKA-p sulisussarsiuussinermi nunaqavissut salliutinneqartalernissaannik siunnersuutaa taamaalilluni illua’tungilersorneqarpoq:
- Suliffiit ingerlalluanngitsut taamaasillutik ingerlaannarsinnaanngussapput. Soorunami aningaasaatit nunatsinniiginnartinneqarnissaat pingaartipparput, eqqarsarnartoqartipparali suliffiit nunanit allaneersut aallarnisarnermut aningaasartuutinik annertungaatsiartunik atuereerlutillu nunaqavissut suliffiutaannut suli unammillerluarsinnaammata, Stig Rømer Wintherip sulisitsisut peqatigiiffiata NUSUKA-p oqaasii illua’tungilerlugit oqarpoq.
Sulisussarsiuussinermi nunaqavissut salliutinneqartarnissaannik sulisitsisut peqatigiiffiat siunnersuuteqarpoq, naak nunaqavissut suliffiutillit suliffinnit nunanit allaneersunit akisunerusinnaagaluartut.
Siunnersuut ineqarnermut angallannermullu naalakkersuisumit, Jørgen Wæver Johansenimit tapersersorneqarpoq, sulisitsut peqatigiiffiannit GA-mit pisariaqanngitsutut nalilerneqarluni, Demokraatininngaanniillu kinaassusersiortutut taaneqarluni.
Siunnersuut Nunavumit isumassarsiarineqarpoq, ukioq 2000-mili nunaqavissunik salliutitsisarneq Nunavumi ingerlanneqarsimammat.
Nunatsinni unammilleqatigiinneq aqqutigalugu aningaasarsiorneq ineriartortinneqassasoq naalakkersuisut siunnerfigaat, Stig Rømer Wintherillu politikki taanna maliinnarneqarnissaa kaammattuutigaa:
- Kalaallit Nunaat nunarsuarmioqatigiinnut ilanngukkaluttuinnartillugu pingaaruteqarpoq unammilleqatigiinnerup attatiinnarneqarnissaa, nunatsinnilu suliffiit unammilleqatigiissinnaanissamut piareersassallugit. Siunissaq ungasissoq isigalugu tamanna nunatsinnut iluaqutaaginnassaaq, Stig Rømer Winther naggasiivoq.
