Stig Rømer Winther: Kalaallit Nunaat soqutigineqaleraluttuinnarpoq
Nunarput soqutigineqaleraluttuinnarpoq - tamatumunngalu silaannaap kiatsikkiartornera ilaatigut patsisaavoq.
Taama isumaqarpoq Stig Rømer Winther, Nunatsinni Takornariaqarnermi Inuussutissarsiornermilu Siunnersuisoqatigiit pisortaat.
Kisianni tamanna takornarianut ussassaarutitut atorneqartarianngilaq, soorlu takornariaqarnermik ilisimatusarsimasup, nunarpullu pillugu ilisimasallip, Lise Lyck-ip, Københavnimi Handelshøjskolimeersup, tamanna ippassaq siunnersuutigigaa.
.- Tamanna malugisinnaavarput nittartakkatta nunatta avataanit alakkakulaneqarnerulerneratigut. Tassa nunarsuarmioqatitsinnit silaannaap kiatsikkiartornerata alaatsinaanneqarnerulernerata kingunerisaanik nunarput soqutigineqarnerulerpoq, Stig Rømer Winther oqarpoq.
Tamatumunnga patsisaavoq avatangiisitigut ajornartorsiutit silaannaap kiatsikkiartornerata nassatarisai silatinnguatsinniimmata.
- Kalaallit Nunaanni Sikuiuitsumi Kujallertulli silaannaap kiatsikkiartornerata kingunerisai ulluinnarni inuunermi takuneqarsinnaapput. Tassami pinngortitami allanngoriartornerit imaaliallaannaq takusinnaavavut, Rømer Winther oqarpoq.
Tamannali pilerisaarutitut atornerlunneqartariaqarsorinngilaa.
Ippassaq Lise Lyckip Københavnimi Handelshøjskolimeersup ippassaq oqaatigaa, nunatta nunarsuarmiunit allanit soqutigineqarnerujussua atorluarneqartariaqaraluartoq. Tamannali Stig Rømer Wintherip isumaqatiginngilaa.
- Pissutsit maani najugaqartuinnaanngitsunut nunarsuarmiunulli tamanut pitsaanngitsumik sunniuteqartut avammut ussassaarutiginissaat nuannarinngilara, Stig Rømer Winther oqarpoq.
- Isumaqarpunga nunarsuarmioqatitsinnut ima oqariartorsinnaanngitsugut; qaagitsi silaannaap kiatsikkaluttuinnarnerata sunniutai torrattorsuit takusarniarsigik. Tassami oqaluttuaq nuanninngitsumik aallaaveqarpoq. Nunarsuarpummiuna nunarsuarmiunit atornerlunneqangaarami kiatsikkaluttuinnartoq. Atornerluinerullu kinguneri maanna takusinnaalerpavut, tamakkualu ussassaarutiginissaat isumaqatiginngilara, Stig Rømer Winther oqarpoq.
