Per Stig Møller: Isummanik allannguisoqassanngilaq

juunip 13-at 2006 14:00

Arfanniarneq pillugu ataatsimiititaliarsuup ataatsimiinnerani aningaasarsiutigalugu arfanniartarnerup inerteqqutaalernissaanut Danmarkimi ilaasortat isumaat ullumi ataatsimiissutigineqarmat allanngortinneqassanngitsoq, Danmarkimi nunanut allanut ministerip Per Stig Møllerip neriorsuutigaa.

- Nungusaataanngitsumik arfanniartarnissaq anguniarparput. Tassa imaappoq kikkulluunniit tamarmik arfernik pisaqarsimasut qassinik pisaqarsimanersut allattorneqartalernissaat anguniarusupparput. Taamaalilluta kikkut tamarmik iluaqutigisinnaasaannik anguniagaqarusuppugut, Danmarkimi nunanut allanut ministeri Per Stig Møller oqarpoq.

Danmarkimi naalakkersuisut isumaat nunatsinni Savalimmiunilu naalakkersuisut isumaannut naapertuuppoq – SF-imili ilaasortat isumaannut naapertuutinngilaq. Partiimi avatangiisit pillugit oqaaseqartartoq Steen Gade ullumi ataatsimeqataasinnarluni anillakkami ima oqarpoq:

- Danmarkimi naalakkersuisut isumaat ukiuni arlalinni isumaqatiginngilara. Siorna allangutsiaraluarpoq ullumili paasinarseqqippoq qangatuulli isummertoqarsimasoq, Steen Gade oqarpoq.

Arfanniarneq pillugu ataatsimiititaliarsuup ukioq kingulleq ataatsimiinnerani Japanimiut ilisimatusaatigalugu arfanniartarnerat akerliuffigalugu Danmarkimi ilaasortat taasisimanerat Steen Gade-p taamatut oqarnermini eqqarsaatigaa. Taamatut akerliulluni taasisoqarnerata kingorna nunatsinniit Savalimmiuniillu ajuusaartoqaqaaq nunanimi taakkunani japanimiut arfernik pisaqartarnerat siornatigut isornartorsiuiffigineqarneq ajorpoq.

Nunatsinniit Savalimmiuniillu naalagaaffeqatigiinnerup aqqani isummanik ukioq manna allannguisoqannginnissaanik danskit nunanut allanut ministeriat neriorsuisinneqarpoq. Taanna ima oqarpoq:

- Ataatsimiinnitsinni tapersersorteqarnera malugisinnaavara. Partiit assigiinngitsut Kuupik Kleistilu danskit isumaat pillugu ataatsimeeqatigereerpakka. Naalagaaffeqatigiinnerup aqqani isummagut siornatut allanngortikkunnanngilagut, Per Stig Møller oqarpoq.

Savalimmiormiut folketingimi ilaasortaatitaat marluk Anfinn Kallsberg aamma Høgni Hoydal ataatsimeeqataapput.