Per Stig Møller: Pingaaruteqarpoq Kalaallit Nunaat nunanut allanut nammineq attaveqartarnissaa
Nunanut allanut politikki pillugu ukiumoortumik nassuiaat Inatsisartuni saqqummiunneqarmat, Danmarkimi nunanut allanut ministeri Per Stig Møller tusarnaarpoq oqarporlu, nunarput nunanut allanut attaveqarnermini aalajangersimanerussasoq, namminerlu nunanut allanut attaveqarnissaa pingaaruteqartoq.
- Kalaallit Nunnaanniippunga inatsisartuni nunanut allanut ataatsimiititaliaq ataatsimeeqatigiartorlugu, inatsisartunilu nunanut allanut politikki pillugu oqallinneq malinnaaffigiartorlugu, Nunanut allanut ministeri Per Stig Møller oqarpoq.
Per Stig Møllerip ilanngullugu oqaatigaa, nunarput nunanut allanut tunngatillugu ajunngitsumik iliortoq pingaarutilinnilu peqataalluartoq.
Isumaqarporli nunatta nammineq nalilertariaqaraa sunut nukitik atorusunnerlugit, tassami suleqatigiissuterpassuaqarpoq, soorlu issittormiunut tunngasut, nunap inoqqaavinut tunngasut, permanent forum, eu-mullu massakkut isumaqatiginniarnerit pingaaruteqartut ingerlasut allarpassuillu. Taamaammat allaffissornikkut suleqatigiinnissamik isumaqatigiissut atsiorparput, Kalaallit Nunaat saqqumilluarnissamik ikiorniassagatsigu, Per Stig Møller oqarpoq.
Per Stig Møller-ip kissaatigaa, Kalaallit Nunaat naalagaaffeqatigiinnermiiginnassasoq suleqatigiinneq ingerlalluarmat, nunattalu Danmarkillu akornanni naalagaaffeqatigiinneq iluaqutigineqarmat.
-Kalaallit Nunaat inukitsunnguuvoq nunaalu isorartuujulluni, Danmarkimullu attaveqarnini iluaqutigaa. Tamanna takusinnaavarput Igaliku-mi isumaqatigiissummi Kalaallit Nunaat Danmarkip USA-llu atsioqatigiinneranni. Massakkullu EU-mut isumaqatiginninniarnerni Danmarkip Kalaallit Nunaat ikiussavaa ikiorlugulumi, taamaammat neriuutiginngilara Kalaallit Nunaat ikiorluangaaratsigu inerneqassasoq Kalaallit Nunaat namminiilerneranik, Per Stig Møller oqarpoq.
Kalaallit Nunaata unammillernerpaasaa massakkut Per Stig Møllerip tassaanerarpaa, Kalaallit Nunaanni aningaasaqarnera ineriartortissallugu, nunarsuarmilu attaveqarnerit annertusarnissai. Takornariaqarnermi, niuernermi tunisassiornermilu inerisarneqarniassammata. Kalaallit Nunaatali attaveqarniarnerit nammineq pilersissagai pingaaruteqartoq, Per Stig Møller oqarpoq.
