Per Stig Møller pasillerneqartutut misigisimavoq
Per Stig Møller folketingimi ullumi apeqqarissaarnermi marloqiusamik sulisimasutut nunanut allanut tunngasunut ministerimit, Villy Søvndal-mit pasillerneqartutut misigisimavoq.
Venstremeersumut Illersornissamut ministeriusimasumut, Gitte Lillelund Bechimut Villy Søvndalip akissuteqarluni, timmisartuussisarsimaneragaanerit pillugit misissuisoqartariaaruttoq oqaatigaa, 2008-miilli nassuiaataasimasut taamaallaat kisimik toqqammavigineqarmata.
- Nassuiaammi 2008-meersumi suna ilumoortuunersoq, Gitte Lillelund Bechip paaserusuppaa.
Amerikamiut aallartitaqarfianni Københavnimiittumi paasissutissat isertuunneqaraluartut, januaarimilu 2011-mi nittartakkamit Wikileaksimit saqqummiunneqartut pineqarmata, Villy Søvndalip ilisimatitsissutigaa.
- USA-p Danmarkillu akornanni isumaqatigeereertoqarsimanera pillugu pasilliuteqartoqarnikuuvoq. Taamaattumillu arlaannaannulluunniit attuumassuteqanngitsunik misissuisitsisoqassasoq, Villy Søvndalimit oqaatigineqarpoq, suliamullu tunngassutilik DIIS-imut misissugassanngortillugu.
Akissuteqaat taanna aallaavigalugu, nunanut allanut tunngasunut ministeriusimasup CIA-p tigusanik timmisartuussisarsimaneri pillugit naalakkersuisut kommissioniliorlutik misissuisitsinissaannik piumasaqalernermik kinguneqarpoq.
- Nunanut allanut tunngasunut ministereqarfimmi atorfilittat uangalu ministeritut marloqiusamik sulisimasutut pasillerneqarnerput pillugu, 2008-miilli paasissutissanik Wikileaksimiit saqqummertoqartarsimasoq, Villy Søvndalip oqaatigaa. Tamanna siornatigut tamakkiisumik tunuartittarsimavara maannakkullumi aamma taamaaliorlunga, Per Stig Møller oqarpoq.
Misissuititsinissami pappilissat ilisimaneqareersut Kalaallit Nunaannut tunngassuteqartut DIIS-imit kisimi suliarineqarnissaa ajornartorsiutaasoq, taanna isumaqarpoq.
- Taamaalilluni nunanut allanut tunngasunut ministereqarfimmut uannulluunniit unnerluutiginninnerit misissorneqarsinnaajunnaassapput, Per Stig Møller, naalakkersuisullu misissuisitsisariaqaraluarnerat kissaatigalugu, taamaalilluni nammineq aamma suliamut tunngatillugu tusarneqarniassagami.