Per Stig Kalaallit Nunaanni

Danskit kalaallillu issittumi soqutigisaannik misissuigasuartussat maanna misissuisinneqalerput.

Nunanut allanut naalakkersuisup, Josef Motzfeldtip, danskillu nunanut allanut ministeriata, Per Stig Møllerip, ataatsimeeqatigiinnerani aalajangerneqartunut tamanna ilaavoq.

- Issittumi soqutigisarpassuaqarpugut, siammasissorujussuummatalu ataqatigiissaarneqarnissaat kissaatigaarput. Assersuutigalugu, issittumi siunnersuisooqatigiit marluk, Sullualuk pillugu canadamiullu attaveqatigiittarpugut, Nunat Avannarliit Siunnersuisooqatigiiffiat, nunatta amerikamiullu suleqatigiinnissamik niueqatigiinnissamillu isumaqatigiissutaat – Joint Committee – kiisalu kalaallit EU-milu nunat ilaasortaasut suleqatigiinnissamik qanittukkut isumaqatigiissutaasa tamarmik misissuiffigineqarnissaat ataqatigiissaarneqarnissaallu kissaatigaarput. Taamaalilluta tulleriiaarisinnaaniassagatta, minnerunngitsumillu avammut saqqummiussisarnitsinni ataatsimoorluta assigiinnik oqaaseqartarnissarput angorusupparput. Neriuppugullu taamaaliornitsigut kimeqarnerusumik nunat assigiinngitsut suleqatiginiarnerini angusaqarsinnaassalluta, Per Stig Møller oqarpoq.

Taanna aperaarput Canadami naalakkersuisut sakkortuumik iliuuseqartarnerisa kingunerisaanik taamatut isumaqatigiissusiorsimanersut, ima akivoq:

- Naamerluinnaq Canadami naalakkersuisut matumani isumaqatigiissusiornitsinnut attuumassuteqanngillat. Siusinnerusukkulli uanga nammineq eqqarsaatersuutigisarsimasara maanna piviusunngortipparput; tassa issittumi assigiinngitsorpassuarnik suliaqartaratta, taakku ataqatigiinnerulersinnissaat pingaarnersiorneqarnissaallu pisariaqalermat, misissuinasuartussanik pilersitsivugut, Per Stig Møller oqarpoq.

Danskit kalaallillu atorfilittat juullertinnagu misissuigasuartinneqassapput, tulleriiaarinissatullu siunnersuutitik taamanikkornissaanut piareersimassavaat.