Per Stig: Ilulissani ataatsimiinnissamut aggersaasoqaqqilli

Danmarkip Arctic Five pilerseqqittariaqarpaa Issittumilu annertunerusumik sunniuteqaqataasinnaanissani anguniarlugu Ilulissani ataatsimeersuaqqittoqarnissaanut aggersaalluni. Danskit nunanut allanut ministererisimasaat, Per Stig Møller, taama isumaqarpoq.

DANMARK/KALAALLIT NUNAAT: Danskit nunanut allanut ministererisimasaat arlallit Issittumi sulianut tunngatillugu maanna akuliupput.

 

Uffe Ellemann-Jensenip Venstremeersup Issittumi sakkutooqarnikkut annertusaaqqullugu Danmark kajumissaaqqammerpaa. Foghillu nalaani nunanut allanut ministeriusimasup, Per Stig Møllerip De Konservativeneersup,  nunat tallimat - Arctic Fivemik taagorneqartut - Ilulissani 2008-mi ataatsimoorlutik nalunaaruteqartuusut katersoqqullugit danskit naalakkersuisui maanna kajumissaarpai.

 

- Issittumi qanoq ineriartortoqarnera eqqarsaatigalugu isumaqarpunga danskit naalakkersuisui nunat issittumiittut, tassalu issittup imartaanut sineriaqartut, Ilulissani ataatsimeersuaqatigeqqinnissaannut aggersaasariaqartut, Per Stig Møller KNR-imut oqarpoq.

 

Issittup imartaanut sineriaqartut immikkut ittumik pisussaaffeqarput

Ilulissani nalunaarut Per Stig Møllerip nunanut allanut ministeriunerata nalaani Kunngeqarfimmit Danmarkimit, Norgemit, Ruslandimit, Canadamit USA-miillu atsioqatigiissutigineqarpoq. Nalunaarummi nunat pineqartut neriorsueqatigiipput Issittumi saqitsaassuteqartoqassagaluarpat tamakku eqqissimasumik iluarsineqartassasut aammalu ilaatigut Issittumi isumannaallisaaneq qanittumik suleqatigiissutigineqassasoq.

 

Nunat Arctic Fivemut ilaasut kingullermik Canadami 2010-mi katersuupput, kingornalu nunat issittup imartaanut sineriaqartut Issittumi Siunnersuisooqatigiinni, Issittumi nunap inuiisa aammalu nunat Issittup avataaniittut peqataatitaqarfigisaanni, taamaallaat naapeqqipput.

 

Tamannalu nunat issittup imartaanut sineriaqartut tallimaasut pisussaaffiisa sammineqarnerannut akornusersueqataasoq, Per Stig Møller isumaqarpoq.

 

- Taakkumi (nunat Issittup avataaniittut, aaqq.) nunat issittup imartaanut sineriaqartutuulli annaassiniarnermut, ujaasinermut allatigullu pisussaaffeqartutut misigisimanatillu pisussaaffeqanngillat. Taamaammat nunat issittumut sineriaqartut immikkuullarissunik pisussaaffeqarput. Pisuussutinimmi atuinermut tunngatillugu immikkuullarissunik pisussaaffeqarpugut, tassalu piujuaannartitsinissamik tunngaveqarluni ingerlatsinissaq.

 

Ilulissani nalunaarummi neriorsuutigineqartoq eqquutsinneqartoq

Danskit kalaallillu Arctic Fivemi nunat ataatsimeeqatigeeqqinnissaannut aggersaanerisigut Naalagaaffeqatigiit Issittumi ineriartortitsinermut siuttuunissaannut aqqutissiuusseqataasinnaasoq, Per Stig Møller oqarpoq. Peqatigitillugu ataatsimeeqatigeeqqinnermi nunat 2008-mi nalunaarummi neriorsuutigisisaminnik eqqaaseqqinneqassapput.

 

- 2008-mi neriorsueqatigiinnitsinnut tunngatillugu sumut killissimanitsinnik naliliinissamut atorneqarsinnaavoq, tamatumanilu eqqarsaatigisakka tassaapput pingaartumik ujaasinermut annaassiniartarnermullu tunngasut. Tamannami suliassaavoq angisuupilussuaq. Aamma imaq pillugu oqartussaaffigisatta qulakkeerniarnissaanut tunngatillugu sumut killippugut. Tamannami nalorninartoqartuaannarpoq, neriorsuutiminnimmi qimarratiginnittoqaratartoqarsinnaajuaannarmat. 

Isumaqarporlu pingaartumik Ruslandip Ukrainemi qanoq iliorneranut tunngatillugu nunat Issittumiittut isumaqatigiissummik naammassisaqarnissaat pisariaqartoq.

 

- Saqitsaannermik pilertoqarsinnaajuaannarpoq issittumi sakkutuuliisoqarneranik kinguneqarsinnaasumik. Ruslandimi naalagaaffiup ilaani sakkutooqarnikkut annertusaavoq, taamaammat eqqisseqatigiinnissamik siunertaqartumik issittumut tunngatillugu aalajangiisoqartarnera uppernarsartissallugu aamma isumatusaarnerussasoq, Per Stig Møllerip KNR-imut oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat