Stig Brahe Sørensen pissartanngorpoq
Nuuk Marathon ullumi ingerlanneqarpoq, katillugillu 18-issaa Nuuk Marathonertoqarluni.
Peqataasut ullumikkut 400-t sinnilaarpaat, angutinilu ajugaasoq tassaavoq Stig Brahe Sørensen. Taassuma atorpai akunnerit marluk, minutit 38-t sekundillu 23-t.
Kim Godtfredsen tulliulluni apuuppoq, Kimip atoramigit akunnerit marluk, minutit 40-t sekundillu aqqanillit.
Frederik Brummerstedt normu 3-tut inissippoq, taassuma atoramigit akunnerit marluk, minutit 47-t sekundillu 17-it.
Arnani Danmarkimi siornatigut pissartaasimasoq Britt Folkermann arnani pissartanngorpoq, taassuma atoramigit akunnerit pingasut minutit 23-t sekundillu 31-t.
Kim Godfredsenip normu 2-tut inissinnini iluarisimaarutigigaluarpaa, ajugaanissanili aamma ujartorsimagaluarlugu. Kim Godtfredsen ima oqarpoq:
- Stig 3 kilometerit kingulliit ullumikkut nukittunerpaavoq. Kisianni niukka ullumikkut oqimaassisoorsimapput, 3 kilometerit kingulliit kigaallarujussuartoorlunga. Ukioq manna aatsaat taama arpalluartigigaluarpunga, niukkali kilometerit kingulliit oqimaallillutik. Kisianni tassa pisinnaagallartillunga arpattuaannarumaarpunga, aappaagulu Europami 10 kilometerimi pissartanngiuttoqalerpat peqataarusussinnaavunga, Nuuk Marathonimi normu 2-nngortoq Kim Godtfredsen oqarpoq.
Kim Godtfredsen veteranit 10 kilometererneranni Europami ukioq manna pissartanngorpoq.