Stieg Larssonip oqaluttualiaanik nassaartoqarpoq

Svenskip atuakkiortup tusaamasap, Stieg Larssonip oqaluttualiarisimasaanik nassaartoqarpoq. Oqaluttualiaq saqqummersinneqassanersoq, Stieg Larssonip kingornussisuisa aalajangigassaraat.
Allattoq Apollo Jeremiassen
juunip 08-at 2010 16:13

Lisbeth Salanderimik inuttallip pinerluttulersaarusiap atuakkiortuata oqaluttualiaa Stockholmimi nassaarineqarpoq.

Oqaluttualiaq amerlavallaanngitsunik quppernilik 1972-mi Stieg Larssonimit allanneqarsimasoq, Stockholmimi atuakkanik atorniartarfimmi oqaluttualiat assaannarmik allakkat toqqorsivianni nassaarineqarpoq.

Akissarsiaqaatiginagu oqaluttualiortartut aningaasaateqarfiannit pilersitsisut, Stieg Larssonip oqaluttualiaa atuakkanik atorniartarfimmut tunissutigineqarsimasut ilagaat.

Oqaluttualiap "Den sista", kalaallisut nutserlugu, "Kingulleq", naleqqulluartumik qulequtserneqarsimasup, saqqummersinneqarnissaa suli nalunarpoq. Saqqummersinneqassappat atuakkiortup, toqoreersup, kingornussisuisa tamanna aalajangigassaraat.

Sverigemi nutaarsiassaqartitsiviit tusatsiagaasa ilagaat, pinerluttulersaarusiat Lisbeth Salanderimik inuttallit atuakkat sisamaannik peqartoq, taannalu 250-nik qupperneqartoq, qarassaasiamiittorlu. Ajoraluartumilli qarasaasiat taanna sumiiffeqartinneqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq