Stephen Harper Nunavummut tikeraarngaarpoq

Canadami ministeriuneq, Konservativineersoq, Stephen Harper, Nunavummut arfininngormat tikeraarngaarpoq. Ministeriuneq oqarpoq, tikeraarnini Canadap Nunavummut issittullu imartaanut piginnittussaanerata naqissuserneqarneratut paasisassaasoq. Stephen Harperip Nunavummiinnermi Canadami sakkutuut Nunavut avannaanni issittup imartaani ulluni aqqaneq marlunni nakkutilliinissaat aamma aallartippaa.

Sakkutuut Nunavummi qeqertaaluup kangiani kitaanilu imartaq nakkutilliivigissavaat, nakkutilliinerlu Canadap issittup imartaanut piginnittussaaneranik naqissusiinertut paasineqartariaqartoq, Stephen Harper Iqalunni taama nassuiaateqarpoq.

Canadami sakkutuut issittup imartaanik nakkutilliinissaat, silaannaap allanngoriartornera pissutigalugu issittup imartaata 2015-imiit aqqutaalersinnaanissaanik sakkutooqarfiup nalunaarusiaanik tunngaveqarpoq.

Canadami sakkutuut Nunavut avataani avannaanilu issittup imartaani nakkutilliinerminni ilaatigut sikoqassutsimik mingutsitsinerup sunniuteqarsimaneranik imartallu aqqutaasinnaassuianik misissuissapput.

Asiamit kitaanut umiarsuakkut assartuinermi aqqussua naannerutinniarlugu Amerika Qiterlermi Panamami ikerasaliaq aqqutigineqartarpoq, issittullu imartaa siunissami aqqutinngussappat Asiamit kitaanut aqqut 7000 kilometerinik naannerulissagaluarpoq.