Stephen Hammeken toquvoq

Tusagassiortoq Stephen Hammeken tallimanngormat juunip qulingani toquvoq, sivisuumik nappareerluni. Ajoraluartumik nappaat qaangersinnaanngisani nappaatigilerlugu 57-iinnarnik ukioqarluni qimaguppoq.

Stephen Hammeken Kalaallit Nunaata Radioani tusagassiortutut 1971-imi ilinniartunngorpoq, ukiullu pingasut ilinniareerluni 1974-imi atorfinivippoq, 1997-imi soraarniuteqarnini tikillugu KNR-imi sulilluni.

Stephen Hammekenip radiokkut tv-kkullu aallakaatitassiarpassui inuiaqatigiinnut kulturimullu tunngasut eqqaamaneqarluassapput, aallakaatitassioriartorlunilu angalasarnermini ilisarisimasarpassuaqalersimavoq.

Stephen Hammeken 1997-imi allamik misileerusulerluni Atuakkiorfimmut nuuppoq, ukiullu arlallit tassani sulereerluni ilinniaqqikkusulluni Ilisimatusarfimmi atualerpoq. Ilinniarninilu ingerlallualeruttorlugu nappaammit anigorsinnaanngisaminit eqqorneqarluni ajoraluartumik toqukkut qimaguppoq.

Stephen Hammeken ilisaassaaq aqagu marlunngornermi juunip 14-iani nal. 13.00 Nuummi Hans Egedep Oqaluffianit.