Stein Bagger ukiuni arfineq-marlunni parnaarussaasussanngorpoq
Stein Bagger, pineqaatissinneqarnissani sioqqullugu pissangarpasilluni nuliilu, Annette Utenthal kunilaartarlugu utaqqivoq. Pineqaatissinneqarnermilu nalaani qerattaareqqissaarluni ukiuni arfineq marlunni paarnaarussassanngortinneqarnini tusarnaarpaa. Danmarkimi suliffeqarfimmik pilersitseqqusaajunnaarpoq, 50 miliuuni koruuninik arsaarneqarpoq, taakkualu saniatigut nuliata, Annette Utenthalip nuliatalu siulliup, Martina Baggerip pinnersaataat aamma arsaarinnissutigineqarput.
Taamatut Danmarkip radioani ilanngutassiortoq, Christian Slot oqaluttuarpoq.
Københavnimi Niuernermik ilinniarfimmi ilisimatooq, Morten Samuelsen oqarpoq, taamatut pillaatissineqarnissaa naatsorsuutigisimallugu, paaserusunnerarpaali unnerluussisut sakkortunerpaamik pillaatissiinissamut piumasaat eqqartuussisup isummerneranut sunniuteqarsimanersoq. Inatsisimmi naapertorlugit pinerluutigisimasap annertussusaa naapertorlugu pillaatissiissutaasinnaasup sivisussusaa 50 procentimik sivitsorneqarsinnaammat. Unnerluussisut sivitsuiniarnerminni pinerluutigineqartup annertunerujussua assissaqanngitsutut nalilersimassavaat, eqqartuussisorli isumaqarsimasinnaavoq suli ingasannerusunik aningaasatigut pinerluuteqartoqarsinnaasoq.
