Steen Lynge præsident nutaaq pillugu: Pituffimmi maluginiagaqassaagut
Pisinissamut neqerooruteqarneq isumaqatigiinngissutaasoq, Pituffimmi kiffartuussinissamik isumaqatigiissut nunatsinnili suliniutinut tapersiinissamut aningaasarpassuit.
USA-mi præsidentitut qinigaaffik pisoqarfiungaatsiarpoq – aamma kalaallit isaannik isigalugu.
USA-mi præsidentit 46-ssaata ullumi ivertinneqarneratigut immikkoortoq nutaaq ullumi aallartippoq. Ulloq pingaaruteqartoq, nunanut allanut tunngasunut naalakkersuisoq, Steen Lynge (D) erseqqissaavoq.
- Nunani sanilerisatsinni – soorlu USA-mi – nutaamik naalakkersuisortaaraata allaffeqarfeqaleraangata pingaaruteqartuaannarpoq. Tamannami suleqatigiinnitsinnut sunniuteqarsinnaavoq, naalakkersuisoq oqarpoq.
Præsidentimik nutaamik ivertitsisoqaraangat tamanna nalliuttorsiornikkut qatseneqartarpoq. Tamannali coronap nunarsuaq tamakkerlugu tunillaassuunnera akerliussutsimillu takutitsisut kongressimut isereernerata kingunerisaanik eqqissiviilliortitsisoqarnissaata ernumassutiginera pissutigalugu ullumikkut allaanerussaaaq.
Niuernermut isumaqatigiiissut kiffartuussinermullu isumaqatigiissut
USA-p nunatsinnut soqutiginniinnarnissaa Steen Lyngep qularutiginngilaa.
- Allaffeqarfimmulli nutaamut suleqatiginninneq aallartissaneripput takunissaa pissanganartoq, taanna oqarpoq.
Taassuma allaffeqarfiup nutaap suleqatigilernissaa qilanaaraa. Niuernermut isumaqatigiissutip ineriartortinnissaa Pituffimmilu pissutsit pillugit isumaqatigiissutip nutaap suliareqqinnisaa ilaatigut qilanaaraa.
- Allaffeqarfiusimasumut isumaqatigiissutigisimasatta suliareqqinnissaanik isumaqarpoq. Ilaatigut niuernermut isumaqatigiissutinik ineriartorteqqinneqartussanik atsiugaqarnikuuvugut.
- Tamatuma saniatigut isumaqatigiissut pitsaasoq Pituffimmut tunngassuteqartoq ineriartortinneqassaaq. Suliassarlu taanna Naalakkersuisut maluginiagaatsiassavaat, uagut aamma taamaaliussaagut, Steen Lynge oqarpoq.
AAMMA ATUARUK Carla Sands Pituffik pillugu suliaminut nersornaasigaasoq
Kiffartuussinissamut isumaqatigiissut maanna atuuttoq, amerikamiut suliffeqarfiata tigummisaa 2024-mi qaangiuttussaavoq. Tamatuma kingorna suliffeqarfik nunatsinni aqutsiveqartoq kiffartuussinermik isumaqatigiissuteqarfigineqassaaq.
Suliffeqarfiup aqutsisui nunatsinni najugaqartuussapput.
