Steen Lynge: Aqumiut nunaqavissut avataaneersunik taarserneqarnavianngillat
Paarlattuanik angallatit naalagaat maannakkut atorfeqartinneqartut - umiarsuarnut nutaanut anginerusunullu piginnaanngorsarneqarput, Steen Lynge Inatsisartuni ilaasortamut Saxtorph Didriksenimut Siumumeersumut akissuteqarluni taama allappoq.
Umiarsuit pilersuisussat nutaat anginerupput, aamma ilinniartitaanermut piginnaasanullu piumasaqaatit allaannerupput, taamaattumik maannakkut inuttaasut umiarsuarnut nutaanut taakkununnga atorfinnut assingusunut toqqaannartumik nuunneqarsinnaanngillat, Steen Lynge akissuteqarluni allappoq.
- Inuttat ilinniartinneqassapput, Royal Arctic Line-llu tamanna ingerlatileruttorpaa, Steen Lynge allappoq.
Piumasaqaatit nunaqavissut inorsillugit nunarsuarmioqatigiit isumaqatigiissutaat qulaatiinnarlugit atuuttussanngortinneqarsinnaanersut, Saxtorph Didriksenip aamma apeqqutigaa.
Nunani tamalaani ilinniartitaanermut piumasaqatit qulaatiinnarneqanngillat, Steen Lynge erseqqissaavoq.
Umiarsuit pilersuisussat nutaat maannakkut umiarsuarnit atorneqartunit ilinniartitaanermut piginnaasanullu annerusunik piumasaqaateqarput. Taamaattumik RAL-ip maannakkut inuttaasut atorfeqartitamik ilinniartitaanerannut aningaasaliivoq ilaatigut angallatini nunaqarfiliartaatini pisoqqani sulisunut tamanna atuulluni, tamatumani RAL ataasiakkaanut naleqqussakkanik ingerlatsinissamik aamma inunnut aalajangersimasumik atorfeqartunut ilinniaqqinnissamik kissaateqartunut aningaasatigut tapersersuinissamik neqerooruteqarluni, Steen Lynge paragraf 37 naapertorlugu apeqqummut akissuteqarluni taama allappoq.
