Steen Lynge aammaarluni pisuussuteqannginnerarpoq

Nalunaarummi radioaviisimi pissarsiarisimasatsinni ima allaqqasoqarpoq:

- Steen Lynge sinnerlugu allaffigaakkit, taannalu oqaluttuarpoq, panippit eqqortumik nakorsartinnissaanut ajornartorsiuteqartutit. Illit panippillu misigisasi peqqinnissaqarfimmullu kissaatitit oqaloqatigiinnissutigerusukkukkit, nakorsat qullersaat Anne Marie Ulrik attaveqaqqullugu qinnuigissavakkit.

Anda Uldummilli neqeroorut taanna assigiinngisitsinertut isigalugu itigartippaa, tamannalu akissutimini aamma allallugu. Aamma Facebook aqqutigalugu attavigineqarnini aamma assuanartoqartikkaa, tamannalu pisortat pitsaasumik ingerlatsinissaannut naapertuinngitsutut isigalugu.

Maannalu Steen Lynge akivoq.

- Taamaaliornitsinnut pissutaavoq, Naalakkersuisunngoqqammerlunga Facebookimi allataani atuarsinnaagakku Peqqinnissaqarfimmut sakkortuupilussuarmik unnerluuteqartoq, Peqqissutsimut Naalakkersuisoq Steen Lynge Atassumeersoq oqarpoq.

Steen Lynge marlunngormat unnuap qeqqalersoq tusagassiorfinnut nalunaaruteqarpoq, aammalu Facebookimi quppernermini erseqqissarpaa Anda uldum pisortatigoortumik maalaaruteqaqqullugu saaffigisimallugu. Anda Uldumimullu saaffiginnissutaasumi pisortatigoortumik maalaaruteqarnissamik kajumissaarummik allassimasoqanngilaq.

Steen Lyngelli aamma erseqqissarpaa politikerit attaveqarfissat eqqortut atorlugit attaveqarnissaat pingaaruteqartorujussuusoq.

- Andreas Uldum politikeritut qaffasissumi inissisimasuuvoq, taamaammat Facebookikkuinnaq unnerluussisinnaanngilaq, Peqqinnissaqarfillu unnerluutigineqarnerminut akissuteqarnissaanut periarfissaqartittariaqarpaa, Steen Lynge oqarpoq.

Taama isornartorsiuineq nangaanartoqarsinnaavoq, pissutigalugu nakorsaanermut toqqaannartumik oqaloqateqarnissaq akuerisimammagu, uffa e-mailikkut, oqarasuaatikkut allakkatigulluunniít Peqqinnissamut aqutsisoqarfimmut attaveqartariaqarsimagaluartoq, tamannami Peqqinnissamut aqutsisoqarfiup nittartagaani saaffiginninnermi periaaseriqartussatut innersuussutigineqarmat.

Tamatuma saniatigut eqqumiiginarsinnaavoq Naalakkersuisoqarfimmini pisortani Anda Uldumimut facebookkiatigut attaveqaqqullugu qinnuigisimammagu. Taamatummi inuiaqatigiinni amerlanerpaat pineqarneq ajormata. Anda Uldum taama pineqarpoq poliitikeriutigaluni facebookkikkut sakkortuumik maalaaruteqarmat, Steen Lynge nassuiaavoq. Taamali oqarnera Anda Uldumip ilisarisinnaanngilaa.

Facebookkianilu unnerluutinik sakkortuunik allaqqasoqanngilaq, Steen Lynge oqarneratut.

Anda Uldumilli nuliata taamaaliorsimanini isertunngilaa.

- Steen Lynge maanna allappoq uiga facebookkikkut maalaarutinik sakkortuunik allassimasoq. Tamanna ilumuunngilaq. UANGA kusananngitsunik allataqarpunga. Uanga arlaleriarlunga nakorsiartarfimmi misigisapilugut pillugit orulluppunga, Charlotte Uldum facebookkimini ilaatigut allappoq.

Taannali Steen Lyngemit attavigineqarsimanngilaq. Steen Lyngellu Anda Uldum isornartorsiorsinnaanngilaa nuliata allassimasaa pissutigalugu.

Naalakkersuisulli Steen Lyngep nassuiaatini aalajangiuteqqavaa, tassa Anda Uldum facebookkikkut sakkortuunik maalaaruteqarsimanera pillugu tassunga attaveqarsimalluni, qanorli maalaaruteqarsimanera eqqaanngilaa..

Steen Lynge Naalakkersuisoqarfiani pisortap Anda Uldumimut saaffiginnissutaa, Anda uldumillu tassunga akissutaa ataani atuarsinnaavatit.