Steen Lynge: 11. klassi eqquteqqinneqarli
Nunatsinni meeqqat atuarfiat Danmarkimi meeqqat atuarfiannut assersuunneqarsinnaanngilaq, maanimi nunatsinni oqaatsit pingasorsuit ilinniartussaagatsigit. Atuartut oqaatsinik pingasunik ilinniartussaanerisigut annertuumik piumaffigineqarput, tamannalu atuartitsissutinut allanut sunniuteqanngitsoornavianngilaq.
- Nunatsinni meeqqat amerlanerusunik unammilligassaqarput, atuarfippassuillu ilinniartitsisussaaleqinerisa saniatigut oqaatsinik pingasunik ilinniartussaallutik . Danmarkimi meeqqat atuarfianni atuartut piffissamik atugaata assingata iluani tamakku tamarmik anguneqartussaapput, Steen Lynge, Atassut tunuliaqutaralugu qinigassanngortittoq nassuiaavoq.
Nammineq kajumissuseq aqqutigalugu meeqqat atuarfianni 11. klassit eqquteqqinneqarnissaat siunnersuutigaa. Tamannalu, Lynge naapertussagaanni, atuartut meeqqat atuarfiata kingorna periarfissaannik pitsanngorsaassaaq.
-Meeqqatta meeqqat atuarfianni 11. klassimi atuarnissaminnik pisariaqartitsinerat nalinginnaasuuinnarpoq. Meerarpassuimmi meeqqat atuarfiannit aniinnarlutik karakteritik pitsanngorsarniarlugit Piareersarfimmi atuartariaqartarput. Piareersarfik inersimasut ilinniagaqanngitsut ilinniakkamik aallartitsinissaminnut atuarnikkut piginnaasaannik pitsanngorsaanissaq siunertaralugu pilersinneqarnikuuvoq, Steen Lynge nassuiaavoq.
