Demokraatit: Steen Lynge
Ateq: Steen Lynge
Ukiut: 55-it
Inuttut inissisimaneq (ilaquttat/qitornat): nuliaqarpoq,
Sunngiffimmi soqutigisat: siunnersorti, pinngortitamiinnermik, nipilersornermik timigissarnermillu assorsuaq sammisalik. Demokraatit sinnerlugit qinigassanngortittoq
Folketingimut qinigaassaguit pingaarnertut sulissutigerusutatit pingasut suuppat?
Silap allanngoriartornera pinngortitamillu mingutsitsineq Nunatsinni inuiaqatigiinnik sunniipput. Nunatta iluani qanoq iliuuseqarsinnaallutalu iliuuseqartussaavugut, kisianni silap allanngornerata avatangiisinillu mingutsitsinerup sumiiffiit aalajangersimasuinnaat eqqorneq ajorpaat. Nunarsuaq tamakkerlugu ajornartorsiutaavoq. Taamaattumik naalagaaffeqatigiinnermi silap allanngornerata avatangiisinillu mingutsitsinerup ataatsimoorluta isummerfigisariaqarnera sulissutigissavara.
Atlantikup Avannaamiuisa suleqatigiiffiat pilerseqqinniarpara, tassami qinikkatta suleqatigiinnginnerat eqqortuliornerunngimmat. Tamatuma nunatta soqutigisaasa folketingimi ingerlanneqarnerat sanngiillisippaa. Nunatta Savalimmiullu soqutigisaat assigiissuterpassuaqarput. Nunarput Savalimmiullu namminersornerunermik ingerlatsipput, taakkunanilu pissutsit immikkut ittut atuupput, taamaattumik nunatta Savalimmiullu suleqatigiinnissaat pisariaqarpoq.
Siunissami nunatta naalagaaffinngornissaa Demokraatit anguniagaraat. Taamaattumik Demokraatit pingasunik alloriarnilimmik aaqqiissuteqarniarput. Alloriarneq siulleq tassaavoq oqartussaaffinnik 32-nik Namminersorneq pillugu inatsit naapertorlugu tigusinissaq, tulleq tassaassaaq oqartussaaffiit sinnerinik nunatta tigusinera, tassa nunanut allanut tunngasunut oqartussaaffik aamma illersorneq pillugu taamalu politikkikkut namminiivinneq. Alloriarneq kingulleq tassaassaaq naalagaaffinngorneq.
Kalaallit Danmarkimi najugaqartut pitsaasumik inuuneqarnissaat qanoq ilillutit qulakkeerinneqataaffigisinnaaviuk?
Akuulersitsiniarnermut aaqqissuussinermik ataatsimoortumik peqalernissaa sulissutigissavara, taannalu KL (Danmarkimi KANUKOKA) suleqatigalugu ineriartortinneqassaaq, illuatungeriit, nunatsinnit nuuttut aamma kommunit, kulturikkut assigiinngissutsit aammalu soorunami akisussaaffiit pisinnaatitaaffiillu pillugit ilisimasaqarniassammata. Nuuttorpassuimmi pisortanit immikkoortitaasutut ullumikkut misigisimapput. Tamannalu paatsuuinermik illuatungeriillu tamarmik ilisimasakippallaarnerinik pissuteqartoq isumaqarpunga.
Folketingimut qinigaassaguit statministerissatut sorleq tapersersussaviuk?
Demokraatit tunngaviatigut isumaqarput kia Danmarkimi ministeriunerussaneranik aalajangiinissaq Danmarkimi nunamut namminermut politikkikkut aalajangigassaasoq. Nunatsinnut innuttaanullu pitsaanerpaamik angusaqarumallutik sullissiumasut sorliugaluarpataluunniit Demokraatit suleqatigiumavaat.