Statsministeri suli nipaakkallassasoraat

Statsminister Lars Løkke Rasmussen nipaangaatsiartoq siunissami pisuni takuneqartalissagunartoq, amerikap Danmarkimi aallartitaa isumaqarpoq.
decembarip 12-at 2010 14:47

Københavnimi COP15-neqarnerani Løkke Rasmussenip naammaginartunik 2009-mi takutitsinnginnerata tamanna pilersissinnaagaa, amerikamiut Danmarkimi ambassade-a taama naliliivoq.

- COP 15-neqarnerata kingorna, siunissaq qaninneq eqqarsaatigalugu, naalakkersuinikkut danskit toqqissisimanerulinngillat, taamaammallu statsministeri nipaannerulersimasutut takuneqarsinnaavoq, aammalu siunissami nunarsuarmi naalakkersuinikkut nuimaniannginnissaa naatsorsuutigineqarsinnaavoq, taama allappoq amerikamiut Danmarkimi ambassadørea, Laurie Susan Fulton, allakkani uppernarsaatini, taakkulu uppernarsaatit Wikileaksimi qanittukkut saqqummiunneqarput.

Nunarsuatsinni politikkimik aamma diplomatiimik ilisimasalik, Københavnip Universitetiani lektori, Peter Viggo Jakobsen paasissutissat saqqummersut isumatusaarnerusorai, pingaartumik eqqarsaatigigaanni statsministerip COP 15-nip nalaani eqarluni aqutsinera.

- Ambassadør Laurie Susan Fulton allat assigalugit naliliivoq, Løkke Rasmussenip ataatsimeersuarnermi taama annertutigisumi siuttuunini iluamik naammassisimanngikkaa, tamannalu artorsaatigigaa aammalu nunarsuarmi pisuni siunissami nuimaniannginnissani eqqarsaatigisimassagaa, Peter Viggo Jakobsen Ritzau-imut oqarpoq.

Københavnimi amerikamiut aallartitaqarfiani nalunaarutit katillugit 297-it, Wikileaks-ikkut saqqummiunneqassasut oqaatigineqarpoq, tassalu una saqqummiussaq siullersaalluni.