Statsministeri kiisami angerlarpoq

apriilip 30-at 2006 13:09

Kiisami iluatsippoq. Statsministeri Anders Fogh Rasmussen ullaap tungaani nunarput qimallugu aallarpoq.

Illersornissamut sakkutooqarfiup timmisartuutaat statsministerip ilaaffigisassaa teknikikkut ajoquteqarmat tallimanngormalli Station Nord-imi ingerlaqqissinnaanani uninngalerpoq.

Aqqaneq qaangilaaraa sakkutuut timmisartuannik Hercules-imik ilaalluni aallarpoq. Islandi aqqusaariarlugu Københavnimut ingerlaqqissasoq, Kangilinnguani sakkutooqarfik nalunaaruteqarpoq.

Statsministerip nunatsinnut tikeraarnera ajornartorsiuffiulaarsimavoq. Siullermik Hans Enoksen-ip napparsimanini peqqutigalugu angalaqataanngeriarluni, Siriusikkormiunik angalaqateqarnissaralua silamik peqquteqartumik kinguartinneqarpoq. Uternissaalu timmisartup ajoquteqarnera peqqutigalugu aamma ullunik marlunnik kinguartinneqartariaqarsimalluni.