Statsministeri aqagu aatsaat nunarput qimassavaa
Statsministerip Anders Fogh Rasmussenip nunatsinnut tikeraareerluni uternissaminut timmisartoq ilaaffigisassaa Hercules teknikkikkut ajoquteqarmat Station Nordimi ingerlaqqinneq ajulerluni uninngavoq.
Statsministerip nunatsinnut tikeraarnera ajornartorsiuteqalaarfiusimavoq. Hans Enoksenip napparsimanini peqqutigalugu angalaqataanissaraluani unitsiinnarsimavaa. Kingorna Anders Foghip siriusikkormiunut tikeraarnissaraluani kinguartissimavaa, silap ajornera peqqutigalugu.
Maannalu tassa aallarnissaralua aamma kinguartinneqarsimavoq.
Illersornissamut sakkutooqarfiup oqaluttuaraa statsministeri timmisartumit Herculesimit iluarsaanneqarsimasumit aaneqassasoq. Islandi aqqusaariarlugu pilersaarutit malillugit aqagu unnukkut Danmarkimut utissaaq.
Statsministeri Odensemi EU-mit tusarniaasoqarnerani peqataasussaagaluarpoq, tamannali kinguartoornini peqqutigalugu unitsiinnartariaqarsimavaa.
