Statsministeri akuliuteqquneqalerpoq
Namminersornerullutik Oqartussat politikerinut atorfilittanullu nuimanernut inatsisinik unioqqutitsillutik illunik pisisitsisimanerat Danmarkimi uitsatigineqaqaaq, taama nutaarsiassaqartitsivik Ritzau ullumi allaaserinnippoq.
Folkepartip folketingimi gruppeata siulittaasua Kristian Thulesen Dahl oqarpoq, nammineq kissaatigalugu kalaallit politikeriisa malersorneqarnissaat statsministerip isumagissagaa.
- Peqquserluttuliorneruvormi anngiortumik pisortanit imminut iluaqutissarsisimaneq. Taamaammat Danmarkimit akuliuttariaqarpugut Kalaallillu Nunaanni oqartussat pisunut akisussaatillugit, Kristian Thulesen Dahl, statsministerimut pisoq pillugu aqagu apeqquteqassamaartoq oqarpoq.
- Pisut taamaattut apeqquserneqartaannarput, uanili illunik pisinermut atatillugu imminut iluaqutissarsiniarsimaneq erseqqilluinnarpoq. Sakkortuumik kinguneqartinneqartariaqarpoq, Thulesen Dahl oqarpoq.
Eqqartuussissuserisut Nuna Advokatit illunik tuniniaanermut nalunaarusiaanni politikerit atorfillillu akikinaarlugit illusisimanerat inatsisinik unioqqutitsinerusoq allaaserineqarpoq.
Inatsisartulli tamarmiusut suli nalunaarusiaq oqaluuserinngilaat, taamaattoq Demokraatineersup Jens B. Frederiksenip piumasarereerpaa, naalakkersuisut tunuassasut.
