Station Nordimi teknikkikkut ajutoortoqarmat maqisoortoqaqqippoq

Kangilinnguani sakkutuut qullersaqarfianni pisortaq, Michael Mouritsen, oqarpoq, maqisoornerit sanillersuunneqarsinnaanngitsut, aammali ajuusaaqaaq.

Ikummatissamik tankimiit tankimut nuussinermi, atortorissaarutit namminneerlutik kalerriisussaanerat iluatsinngitsoorsimavoq. Tassa malussarniut, tanki ulikkaarpat nalunaartussaaq, ajoquteqarsimavoq, nalunaanngitsoorlunilu. Tamannalu ikummatissap 29 kubikmeterisut angitigisup pinngortitamut malussarissumut maqisoorneranik kinguneqarpoq.

Station Nordimi ukiup ataatsip ingerlanerinnaani maqisoornerit taanna aapparaat.

- Soorunami ajorpoq, ajuusaarutigaarput uuliamik taamatut maqisoortoqarmat. Maqisoornerilli taakku marluk imminut sanilliunneqarsinnaanngillat, maqisoornerilli taakku marluk soorunami akuersaarneqarsinnaanngillat, Kangilinnguani sakkutuut qullersaqarfianni pisortaq, Michael Mouritsen, oqarpoq

Taanna nangilluni nassuiaavoq, tankiutitik Nunatsinniittut qanganisaasut, nutarsarnissaannulli annertuumik pilersaarusiortoqareersimavoq.

- Station Nordimi maqisoorneq pissutigalugu suleriaatsivut qimerlooqqittariaqarpavut, aaqqitassaqarpallu aaqqinniarsarissallugit. Isumannaalisaanermi pingaaruteqarpoq, Michael Mouritsen oqarpoq.

Michael Mouritsen ilisimatitsivoq, tankini suliaqartartut tamarmik erseqqisaaffigineqarsimasut, sissuerluinnartaqqullugit, ajornanngikkaangat atortut nammineq nakkutiginnittut isumalluutigiinnartassanngikkaat, eqqarsartuassasut aammalu suliat ingerlanerini nakkutigiuartassagaat.
Ikuimmatissaq maqisoorutigisaq oqitsuusoq aalannguutiasoq, Kangilinnguani sakkutuut qullersaqarfianni pisortaq nassuiaavoq.

Illersornissaqarfiup illuutinut pigisanullu allanut immikkoortortaani avatangiisinut tunngasuni oqaaseqartartua, Ann Kjemtrup, naapertorlugu maqisoorneq annertuvoq.

- Issittumi avatangiisit pineqarmata uuliamik maqisoorneq soorunami aarlerinarpoq. Issittumi avatangiisit malussajasorujussuupput, uuliamillu maqisoorneq sivisuumik kingunipiloqartarluni. Avatangiisinillu saliilluarnissaq taamaammat pingaaruteqarpoq, Ann Kjemtrup oqarpoq.

Illersornissamut taamani ministerisoq Gitte Lillelund Bech pinngortitamut avatangiisinullu  naalakkersuisumut, Anthon Frederiksenimut, siorna isumaqatigiissuteqarpoq, uuliamut tankit immerneqarneranni nuussinermiluunniit nakkutigiuaannarneqartassasut.