Station Nordimi benziinaarluertoqarsimagunanngilaq

Kangilinnguani sakkutooqarfiup Station Nordimi benziinaarluertoqarsimasoriunnaarpaa.

Sapaatip-akunnerata uuma aallartilaarnerani timmisartup orsussaa 11.400 literi ruujorip putuneratigut erngarsimassasorineqartoq taqqavannga nalunaarutigineqarpoq.

- Erngartoqarsimanissaa ilimagiunnaarparput, Kangilinnguani sakkutooqarfimmi oberstløjtnant Ole Sparrevohn oqarpoq.

Station Nordimi sakkutut ulluni kingullerni immikkut atortorissaaruserlutik ruujori atuarlugu erngarfiusinnaasumik ujaasipput, nassaaratilli.

Orsussaq taama angitigisoq sumut pisimassanersoq sakkutuunit allatut maanna nassuiarneqarpoq.

Sakkutuut sissuertuusut arlaat kukkulluni orsussamik immiinermini peqqumaasivitoqqamut atorunnaarneqarsimasumut qipisassaminik qipisisoorsimagunartoq ilimagineqalerpoq.

Tamanna uppernarsiniarlugu sakkutuut maanna peqqumaasivitoqqap tungaanut nunamik assaapput. Oberstløjtnant Ole Sparrevohnip ilimagaa sapaatip-akunnerani tullermi peqqumaasivitoqaq nuisissinnaassallugu.