Startupimi ajugaasoq uumasuusiveeqqamik pilersitsiniarpoq

Nuummi uumasuusiveeqqamik pilersitsinissamik suliniuteqarnissamik siunnersuut pitsaanerpaatut nalilerneqarpoq. Net-aviisi arnanut saaffiginnittoq, umiarsuaq neriniartarfiutigisoq, kræftimik eqqugaanikut nittartakkakkut naapittarfiat, biilini kiassaat aputinik aatsitsisinnaasoq skateboardertarfissuarlu aamma siunnersuutigineqarput.  

Angutimmarik Hansenillu siunnersuutaa aallartisarneqaleruttorpoq.

- Uumasut assigiinngitsut qulit eqqarsaatigivakka. Amerlavallaartinnaveersaarlugit siullermik. Ajornannginnerusumik tikinneqarsinnaasut imaluunniit takuneqarsinnaasut, soorlu tuttu, umimmak, terianniaq, ukaleq, aqissi taavalu uumasuutigineqareersut kukkukuut, nersutit, hiistit, savat nerlerillu, Angutinnguaq Hansen oqarpoq, oqaatigaalu qangali isumassarsiarereernikuullugu.

- Startup Greenlandip ingerlanneqarnerani isummanik tunineqarnera taavalu ikiortiserineqarnera atorluarlugu piviusunngortinniarsarissavara, Angutimmarik Hansen oqarpoq, nangillunilu.

- Nuummiitippara inuttunersaammat taavalu sineriamminngaanniit Nuummukartoqartaqimmat. Ulluinnarni atuarfeqarfiit, meeqqat weekendinilu inuit sulinngiffeqartut susassaqarfittut atussavaat, soorunami aamma turistit, Startupimi ajugaasoq, saniatigullu 5000 koruuninik suliniummut atugassaminik eqquisoq, Angutimmarik Hansen oqarpoq.