Sri Lankami sorsunneq Nunatsinnit malinnaaffigineqarpoq
Sri Lankameersoq Lawson Kotalawala paninilu maani inunngortoq Navarana Kotalawala tusakkatik misigissutsinik assigiinngitsunik misigisaqarfigaat.
- Nuannaarlunga oqarsinnaanngilanga. Sorsunnerummi malittai amiilaarnarsimapput, maannali ilorraaq tungaanut ingerlalernissamut neriuutissaqalerpoq. Navarana Kotalawala taama oqarpoq.
Navaranap angutaa Lawson Kotalawala 1979-imi Sri Lankamit nunatsinnut nunassippoq. Lawsonip neriuutigaa Sri Lankami inuiaqatigiit eqqissillutik inooqatigiilersinnaanissaat.
- Misigisimavunga Sri Lankami inuiaqatigiit qangatut eqqissisimaqatigiillutik inuulersinnaasut. Ikinngutikka tamarmik Tamiiliupput, uangali Singhaleseriuvunga. Tamannali pingaarnerunngilaq, ungasikkaluaqalutalu inooqatigiissinnaavugut, Lawson Kotalawala oqarpoq nangillunilu:
- Sorsunneq akisusimaqisoq maanna qaangiuppoq. Ineriartornermut sunniuteqarsimaqaaq. Nutaamik aallarteqqinnissamut periarfissagissaarput. Ikilikkat katsorsarneqarsinnaalerput; angajoqqaarpassuit sorsunnermi meeqqaminnik annaasaqarsimapput; maannali iluarsartuussivissanngortoq, Lawson Kotalawala naggasiivoq.
