Sri Lankami qaartartoq nunamut ilisagaq qaarpoq
Sri Lankami bussi qaartartumeerneqarmat –qaartartoq nunamut ilisakkap qaarsimanissaa ilimagineqarpoq – qaartoqarnerani inuit 64-t toqutaapput 78-illu ikiligaasimallutik.
Tappavani naalakkersuisut pikititsinianik De Tamilske Tigrenik taagutilinnik pisuutitsipput.
Pikititsinialli qaartartumeerisimannginnerarlutik nalunaaruteqarnertik iluatsillugu toqqorsimaffitik sakkutuunit saassunneqaqattaartut.
Bussip inunnik ulikkaaqasup qaartartoq nunamut ilisagaq qarsummagu issimasut 64-t toqutaapput 78-illu ikigaallutik. Arnat meeqqallu 15-t toqutaasunut ilaapput.
Sri Lankami naalakkersuisut pikititsiniallu De Tamilske Tigerinik taagorneqartut 2002-imili eqqisseqatigiinniarlutik isumaqatigiissuteqarmatali aatsaat taama aagasatsigisumik qaartartumik qaartoqarpoq.
Tappavani naalakkersuisut pikititsinianik pisuutitsipput. Pikititsinialli qaartartumeerisimannginnerarlutik nalunaarput tusaamanerlunneqarnerulernissaallu anguniarlugu taamatut pisuutitsiniartoqartoq taakku erseqqissaassutigaat.
Bussip qaartinneqarnerata kingorna nalunaaqutap akunneri marluk qaangiuttut sakkutuut timmisartulisarlutik pikititsiniat toqqorsimaartarfiit nunap kangisinnerusortaaniittut saassuppaat.
Sri Lankami hindumik kristumiussutsimillu upperisallit tappavani ikinnerussuteqartuusut De Tamilske Tigerinut ilaasortaapput. Taakku buddistinit amerlanerussuteqartunit immikkoortinneqartutut misigisimapput. Sri Lankap avannarpasinnerusortaani kangisinnerusortaanilu namminersulernissartik aamma kissaatigaat. Taamatullu namminersulernissamik kissaateqarnerup kingunerisaanik saassusisaqattaartoqartarnerani inuit 65.000-t katillutik toqutaasimapput.
Norgemiut isumaqatigiisitsiniartoralugit 2002-mi februaariugaa illuatungeriit eqqisseqatigiinnisamik atsioqatigiipput. Illuatungeriit decembarimiilli maannamut imminnut saassusisaqattaartarnerisa kingunerisaanik inuit 720-t toqutaasimapput.
Norgemiullu sapaatip akunnerani kingullermi illuatungeriit Oslomi eqqisseqatigiinnissaat anguniarlugu naapitsinniaraluaramikkik iluatitsisimanngillat.
