Sri Lankami præsidenti qinigaaqqippoq
Maanna naalakkersuisut sakkutuuisa sakkulisartut akunnittarfik præsidentip unammillertaata nukittunerpaap - maannali ajorsartitaasup najugaa - ungusimavaat. Illoqarfiulli ilaani nalliuttorsiortoqarpoq.
Sri Lankami præsidentip Rajabakse-p ippassaq ajugaanera illoqarfiit pingaarnersaanni Colombomi qummoroortarnikkut nalliussineqarpoq. Illoqarfimmi innuttaasut ilaat oqaluttuarpoq, Sri Lankami præsidentiusarsimasut arfiniliusut kisiannili Rajabakse-p kisimi silarsuarmioqatit sinnerinut illersoraatik. lloqarfimmili akunnittarfimmi præsidentip unammillertaata general Fonsecap najugaani pisut toqqissisimananngillat. Sri Lankamiut sakkutuuisa 100-likkuutaat akunnittarfik ungusimavaat, sakkutuut eqqarasuartaatinik aallaasilerlutik nakkutilliipput. Præsidentip akerlerisani annilaartinniarunarpai, naalakkersuisuni illuatungiliuttuni Narao Hageemimi ilaasortaq oqarpoq. Sakkutuut akunnittarfiup eqqaaniittut sakkutuunik qimaasimasunik ujarliinnarput, Sri Lankami naalakkersuisut uppernarsaapput. Præsidentimik qinersineq innuttaasut ukiuni 25-ni Sri Lankamut nunasisunit kingoqqisut Tamilillu ikinnerussuteqartut akornanni aattaqaqisumik sorsuunnerisa kingornatigut siullerpaavoq.
Ingiarniuttut marluullutik qaammatit arfineq-pingasut matuma siornatigut pikitsitsiniat Tamilimiut tiigerii ajugaaffigimmatigik sorsunneq unitsinneqarpoq, isumaqatigiikkunnaaramilli general Fonseca aalajangerpoq siornatigut naalagarisimasani præsidenti akerleralugu qinigassanngortinniarluni. Fonsecap ajorsarnini pisortatigoortumik suli akueriumanngilaa, akuersinissaanulli piffissaq kisimi apeqqutaasoq tuluit tusagassaqartitsiviata BBC-p nalunaarutigaa.
