Spiermannip nalunaarusiaa naammassivoq
Radioaviisip tusagai naapertorlugit, Qasigiannguani efterskolissamut 11,5 millioni koruuninik ilassutitut aningaasaliissutiliinermi allaffissornikkut inatsisaatsuliortoqarsimasinnaaneranik
inatsisilerituup, professor Ole Spiermannip, naliliinera Naalakkersuisut maanna tigoreersimalerpaat.
Qanoq inerniliisoqarsimaneranik innuttaasut suli tusartinneqarsimannginnerannut naliliinerup maannakkut nutserneqarnera peqqutaasoq, Radioaviisip Namminersornerullutik Oqartussanit tusarfianit oqaatigineqarpoq.
Nalunaarusiap nutsernera ilanngullugu qaammatip naalernerani aatsaat saqqummiunneqassasoq ilimagineqarpoq.
Qasigiannguani efterskolissaq Inatsisartut ukiaanerani ataatsimiinneranni oqallisaaqaaq, Tommy Marøp naalakkersuisoqarfia, KIIIP, paasissutissanik pingaaruteqartunik isorinittunillu isertuussisimasutut Inatsisartut Aningaasaqarnermut Ataatsimiititaliaanit pisuutinneqarluni.