Spider-Man 3 isiginnaariakaavaat

Filmi nutaaq meeqqanit inuusuttuniillu nuannarineqarluartoq Spider-Man 3 filmini nuannarineqarnerpaani tamani rekordiliisutut aviisip B.T.-p allaaseraa.

Angutip aasiattut pissuseqalersartup, eqaatsorsuup sapiitsorsuullu, qassusiaminut kikkut tamaasa pisarisimagai, aviisit allaaseraat.

USA-milu takuteqqaarneqarneraniit ullut pingasut qaangiutiinnartut filmip suliarineqarnerata nalinganik tassa 1,5 mia. koruuninik iluanaarutaareerpoq.

Filmi USA-mi tallimanngormat takuteqqaarneqarpoq. USA-milu filmertarfinni katillugit 4.252-iusuni ulluni pingasuni siullerni 831 mio. koruunit bilitsiinnarnit iluanaarutaasimasut allaaserineqarpoq.

Spider-Man 3 USA-mi suli takutinneqannginnerani Asia-mi nunani assigiinngitsuni arfineq-pingasuni takuteqqaarneqarpoq, oqaatigineqarporlu sapaatip-akunnerunngitsorluunniit aningaasat 2,1 milliardi koruunit isertitsissutaasimasut.

Spider-Man 3 Katuami sisamanngormat aallartittumik takuneqarsinnaalerpoq, ippassaannarlu 300-t isiginnaariarsimapput.