Spejderit Narsarsuarmi tammaarsimaarnerat iluatsilluarpoq
Spejderit Frankrigimeersut, Savalimmiuneersut Nunatsinneersullu Narsarsuarmi sapaatit akunnera ataaseq tammaarsimaaqqammerput. Sapaatiummat kingullermi ammaanersiortoqarnera kingorna assigiinngitsunik sammisassaqartilluarneqarsimapput.
Allattoq Peter Troelsen, Simon Uldum
juulip 29-at 2013 07:00
Inuit pinnguaataat, soorlu naanngisat, pulaartut ajagarlu peqataasunut misilitsinneqarput, aammalu orienteringsløbertinneqarlutik. Aammattaaq Qassiarsummi savaalinnut pulaartoqarpoq, peqataasullu ammeralutik mersornermik qisummillu qiperuillutik aamma misileraatinneqarlutik.
Frankrigimiut peqataasut misigisaasa annerit ilagaat, Frankrigip erfalasuata puisip amianik mersornera. Peqataasut sapaatit akunnerata ingerlanerani Narsarsuarmiut aamma ilisarisimallualerpaat. Spejderit tammaarsimaarfiata eqqaani sapaatit akunnerata naanerani aamma qaqqani pisuttuartoqarpoq, Igalikumut tikeraartoqarluni sermersuarmullu pisuttuartoqarluni.
Sapaammi Sermersuarmut pisuttoqarpoq, unnukkullu ikumaartitsisoqarluni erinarsoqatigiilluni inuulluaqqusisoqarluni.
