Spejderit tammaarsimaaqatigeeqqaarnerat ukiunik 100-nngortorsiorlugu, spejderit nunarsuarmi tamarmi 40.000-iusut ilamininngui Tuluit Nunaanni ulluni makkunani tammaarsimaaleruttorput, tappavanilu nunatsinneersut spejderit 21-t peqataapput.
-Ajoraluartumilli nunatta erfalasua katinngat ullorsiornermi atorneqarsinnaasimanngilaq, Nunatsinni spejderit kattuffianni siulittaasoq Hans Kristian Lennert oqarpoq.
- Naalagaaffiunnginnattagooq scenep qaaniititaqarsinnaanngilagut, qallunaat ataaniikkatta, taamatut nassuiarpaat, aallartippoq.
Spejderit nunatsinneersut isumaqarsimagaluarput katinngatilisaarnissamut akuerineqassallutik.
- Uggornarpoq, kisianni aappaatigut nuannaarutigisorujussuuarput qallunaat ataaniittutut isigineqarluta Brownsea Islandimut nassuissisinnaagatta, spejderit ukiut 100-nngortorsioqqissaarneranni ullaakkut nalliussineqarnerani kalaallit peqataatitaqarsinnaagatta. Savalimmiormiut inuusuttumik ataatsimik aamma peqataatitaqarput, taassumattaaq Savalimmiormiut katinngataat nittarsaassinnaanngilaa.
- Peqataanerput alloriarneruvoq siulleq. Akuerivaatigut peqataanissatsinnik, naak nammineq naalagaaffiunngikkaluartugut. Erfalasoq-una taamaallaat aporfiusoq, nunatsinni spejderit kattuffiata siulittaasua oqarpoq.
- Suliassaq tullinnguuttoq tassaavoq, Kalaallit Nunaanni Spejderit Kattuffiata Nunarsuarmi Spejderit Kattuffiannut toqqaannartumik nunatut ilaasortanngorsinnaanera. Eqqartorneqartareernikuuvoq, aamma periarfissatut piukkunneqarpoq. Taanna anguniagassarivarput, taamaattumillu suliassanut ilaasinnarluni, Hans Kristian Lennert oqarpoq.
Nunatsinni spejderit 18-it angallassisullu pingasut Tuluit Nunaanni Brownsea Islandimi aggustip ulluisa arfineq-pingajuata tungaanut tammaarsimaaqataapput.
