Nuuk spejder gruppeni siulittaasoq Marie Møller-Lynge oqarpoq ukiuni siusinnerusuni spejderit ilaasortaqarnermikkut uniusavissimagaluartut kingumulli ingerlalluaqqilersimasut.
- Siusinnerusukkut ataatsimiittarnerni aqutsisussaaleqisarneq ajornartorsiummut patsisaavoq maannali gruppeni taakkunani marlunneersunik aqutsisoqartalerpoq, Marie Møller-Lynge oqarpoq.
Taassuma ugguaraa kalaallisut oqaasilinnik aqutsisoqartannginnera tunngaviulluni ilaasortat ilaasortaajumajunnaartarmata.
- Tassa taanna aporfiuvoq taamaalillunilu tassa kalaallisut oqaasillit ilaasortaajumajunnaartarput namminneq oqaaseqaqatiminnik aquttoqartanngimmat, oqarpoq.
Taanna aperaarput spejdereqarnerup soqutigineqarnera ingerlaannassappat qanoq iliortoqarsinnaanersoq.
- Kingullermik ataatsimiinnermi uagut angajoqqaaqatigiit ataatsimiinnermi ikiuuttarsinnaanissarput oqaluuseraarput, taannalu ukiaru aallarteqqilerpata ataatsimiilerutta eqqartoqqittussaassavarput, oqarpoq.
Marie aperaarput siornatigut spejdererpassuit amerlaqalutik sinerissami angalarrattarnerat sooq ullutsinni takussaajunnaarnersoq.
- Ilaatigut aningaasat aporfiusarput kisianni aamma pilersaarusiugassarujussuuvoq, nalunngilara aappaagumut tammaarsimaarsuaarnissaq pilersaarusiorlugu aallartisarneqartoq, taama oqarpoq Nuuk spejder-gruppemi siulittaasoq Marie Møller-Lynge.