Spaniap ilaani ukiuni 40-ni ukiuunerani aatsaat taama silapilutsigisoq
Spaniap avannaani kangisissuani ukiuni 40-ni aatsaat taama ukiuunerani anorersuartigivoq. Inuit ikinnerpaamik pingasut ajunaarput, Cataloniamilu innuttaasut 220.000-it marlunngornermi akunnerni qassiiusuni innaallagiaqanngillat.
Apingaatsiarneralu pissutigalugu atuarfiit matoqqatinneqartariarput, aqquserngillu qimuttuitsullu aqqutaaq aamma aqqutigiuminaallutik.
Spaniami silasiorfik, Aemet naapertorlugu Spaniap avannaani kippasissuani sillamaniarnermik kalerrisaaruteqarpoq. Spaniami sapaatiummalli anorersualerpoq, anorersuarlu ”Gloria”-mik taaguuserneqarluni.
Malerujussuit
Anori akunnermut 100 kilometerinik sakkortussuseqartutut uuttorneqarpoq, tamatumalu saniatigut apillunilu siallertarpoq, sialullu sikunnguuttarluni. Anorersuup malitsigisaanik malerujussuit sissap sineriaanut, pisuttarfinnut annguttarput. Tassanngalu pisiniarfiit neriniartarfiillu sissaniittut sequtserneqarlutik.
Nunap immikkoortuani Gironami Cataloniap avannaani kippasissumiittumi innuttaasut 220.000-t innaallagiaaruttut, illoqarfiup annaassiniartartui paasissutissiipput.
Aqqusinersuaq, motorveji AP7 lastbiilit ingerlaartarfiat pingaaruteqartoq Spaniamut Frankrigimullu atassuteqartitsisoq killeqarfiup qeqqani aperujussuarneranit matoorneqarpoq. Sumiiffimmilu tassani qimuttuitsut aqqutaat apummit aamma eqqugaalluni.
Mittarfik matoqqasoq
Spaniami sapaatiummat siullermik anorersualerpoq, tusagassiorfiillu qassiiusut naapertorlugu inuit sisamat ajunaarput. Arnaq 54-inik ukiulik, Rumaniameersoq angerlarsimaffeqanngitsoq ajunaartut ilagaat. Taanna Valenciap qanittuani illoqarfimmi Gandiami qiusimasoq ataasinngornermi ullaakkut nassaarineqarpoq.
Anorersuaq ”Gloria” Spaniami nunap immikkoortuani Valenciami qeqertanilu Mallorca ilaaffigisaani ataasinngornermi aserorteringaatsiartoq, BBC-ip nalunaarutigaa.
Silapilunnera pissutigalugu Alicantemi mittarfik matoqqatinneqartariaqarsimavoq. Tamannalu pissutigalugu timmisartuussinissat 200-t missaanniittut taamaatiinnarneqarput.
Pyrenæerit marlunngornermi eqqugaapput Frankrigillu kujasissortaani silapilorujussuarnissaa oqartussat piareersarfigileruttorpaat.
