Spaniamiut nunatsinniittut Spaniami tv-kkut isiginnaagassiaraat

Nunarput pillugu tv-kkut aallakaatitassiaq, Spaniami tv-mi kanal 1-imi aqagu aallakaatinneqalerpat Spaniamiut tv-kkut isiginnaartartut 4 millioninik amerlassusillit isiginnaarumaartut naatsorsuutigineqarpoq.

Tv-kkut isiginnaagassiami Spaniamiut nunarsuatsinni sumi tamaaniittut sammineqarput, isiginnaagassiarlu Spaniami nuannarineqaqisoq, Nunatsinni takornariaqarnermut inuussutissarsiornermullu siunnersuisoqatigiinnit ilisimatitsissutigineqarpoq.

- Spaniamiut nunamut allamut nunassikkallarsimasut imaluunniit nuuissimasut tv-kkut isiginnaagassiami pineqarput, isiginnaagassiamilu aqagu aallakaatinneqartussami Spaniamiut Nunatsinniittut sammineqassallutik, Malik Milfeldt siunnersuisoqatigiinneersoq oqarpoq.

Spaniamiut tv-liortut aasaq manna sapaatip akunnerani Aasianniipput tamatumalu kingorna Kujataaniillutik, Spaniamiut takornarialerinermik suliaqartut ataaserlu katersugaasivimmi sulisoq malinnaavigineqarlutik.

- Aallakaatitassiamut takoqqusaarut tunngavigalugu naliliissagaanni tv-kkut assiliisut, aasakkut assilisanik kusanarluinnartunik assiliisimapput. Tamatumunnga atatillugu Spaniamiut amerlanerusut Kalaallit Nunaaliarusulernissaat neriuutigaarput, Malik Milfeldt oqarpoq.

Spaniamiut tv-liortut Aasiannut, Narsarsuarmut, Narsamut Nanortalimmullu aasaq manna angalaneranni, Nunatsinni takornariaqarnermut inuussutissarsiornermullu siunnersuisoqatigiinnit ikiorserneqarput.