Spaniamiu Californiamit Hawaii-imut anguartortoq
Spaniamiup angalatuup siullersaarluni anguartuinnarluni Manerassuaq ikaarpaa.
Antonio de la Rosa 42-nik ukiulik angalatooq, Calliforniamit ullut 76-it atorlugit 4000 kilometerit anguartoreerluni Hawaiimut tikippoq. Nutaarsiassaqartitsivik AP taama allaaserisaqarpoq.
Angalatuup paddleboard, 6,4 meterinik takissuseqartoq nammineq sanaajusoq atorpaa, anguartornerminilu ulussaarsuaq Flossie, 200 kilometerinik ungasitsigiinnarlugu sanioqquppaa. Antonio de la Rosa anori iluaqutigalugu, sarfarserlunilu anguartorluni Californiamit Hawaiimut apuussinnaasimavoq, nerisanillu oqitsuinnarnik aalisakkanillu inuussuteqarsinnaasimalluni.
Ullormut akunnerit arfineq-pingasut qulillu akornanni anguartortarsimanini, Spaniamiup angalatuup oqaluttuaraa:
- Sakkortullunilu ilungersornarmat nuannaraara, Antonio de la Rosa oqarpoq.
Spaniamiup paddleboardia sinittarfeeraqarpoq, eqqaaveqarluni, seqernullu qinngornerinit nukiliuut atorlugu atortut elektroniskiusut aamma atorsinnaasimallugit.
De la Rosap iberiap qeqertaasaata sineriaa 3500 kilometerinik isorartussuseqartoq ulluni 141-ni siusinnerusukkut aamma anguartorfiginikuuaa.