Spaniami timmisartut naalakkat suliartoqqipput
Timmisartut naalagaasa suliumajunnaarnertik ippassaq ualikkut sakkortusivaat, tassa akissarsiatigut sulinermilu atukkamikkut ajornerusumik inissisimalernissartik pissutigalugu napparsimallutik nuna tamakkerlugu nalunaaruteqarmata.
Spaniami naalakkersuisut oqaatigaat, Spaniami timmisartut naalagaat 2300-t missaanniittut, taakkulu ilarpassui ukiumut 3 millionit koruunit sinnerlugit akissarsiaqartut.
Sapaatit akunnerisa naaneri ulapaarfiunerpaasartut ilaat aallartilersorlu suliumajunnaarneq pivoq, Spaniamilu mittarfinni tamani paatsiveerunnernik kinguneqarluni. Ilaasussat 300.000-it missaanniittut eqqugaapput, mittarfeqarfinnilu aamma akunnittarfinni mittarfinnut qanittuniittuni unnuisariaqarsimallutik.
Ministeriunerup Jose Lois Rodrigues Zapaterop, timmisartut naalagaasa suliassaraluinik sakkutuut isumaginneqqullugit ippassaq unnukkut piumaffigai. Taakkuli timmisartuussinerup suliumajunnaarnermit eqqugaanera iliuuseqarfigisinnaanngilaat.
Ulloq unnuarlu suliumajunnaartoqareersorlu timmisartut naalagaat ualeq manna suliartoqqipput. Tamatumalu kingorna angallannermut ministerip Spaniami timmisartuussineq ammaqqittoq nalunaarutigaa.
Taamaattorli Spaniami timmisartuussineq ataasinngorneq ilanngullugu pissusissamisuussanngitsoq nalunaarutigineqarpoq.