Spaniami timmisartoq nakkarpoq

Timmisartoq, SAS-ip pigisaaniit Spanair-imeersoq Madridip mittarfianiit aallatsiaannarluni ullumi nakkarmat, inuit 150-it missaanniittut ajunaarsimassangatinneqalerput. Issimasut 173-iusut ilaat 27-t maannamut annaanneqarsimapput. Timmisartoq, MD-82-imik taaguutilik Madridimiit Gran Canariamukarluni tingigaluarluni nakkarpoq.
Allattoq Najaaraq Egede
aggustip 20-at 2008 16:55

Spaniamiut aviisianni, El Mundo-mi, allaaserisaq naapertorlugu timmisartoq aallaqqaaraluariarluni uterami nalunaaquttap akunnera ataaseq qaangiummat aallaqqikkaluarluni nakkarpoq.

Arnaq timmisartup tingineranik isiginnittoq aamma oqaluttuarpoq timmisartoq qangattatsiaannarluni nakkarami qaartoq.

Qaartup pujornersua annaassiniarnermut ajoqutaavoq.

Sverigemi nunanut allanut ministereqarfimmiit nalunaarutigineqarpoq svenskit pingasut ilaasimasut, danskinilli timmisartumi ilaasoqarsimanersoq manna tikillugu ilisimaneqanngilaq.

Københavnip timmisartoqarfiani tusagassiortunik katersuutsitsinermi SAS-ip qullersaqarfiani pisortap, Mats Jansson-ip pisimasoq ajunaarnertut alianarluinnartutut oqaatigaa.

Kikkut qassillu issimasuusimanersut aatsaat aqagu aqaguaguluunniit tamanut nalunaarutigineqassaaq. Ajunaartut ilaqutai qanigisaalu nalunaarfigineqaqqaartussaammata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq