Spaniami arnarpassuit naalakkersuisunngorput

Spania oqaluttuarisaanerminik allanngortitsivoq, tassami naalakkersuisuutitaalersut 17-t affai sinnerlugit arnaapput. Taakku naalakkersuisut siulittaasuata socialistineersup José Luis Rodríguez Zapateros-p toqqagarai.
Allattoq Najaaraq Egede
apriilip 12-at 2008 13:20

Spaniami aamma aatsaavissuaq arnamik illersornissamut ministereqalerpoq. Tassaavoq ineqarnermut ministeriusimasoq Carme Chacon.

Naalakkersuisuuffiit oqimaannertut taaneqarsinnaasut inuttaat allanngunngillat. Allalli tassa arnaannangajannik inuttalerneqarput, taamaalilluni Spaniami naalakkersuisuutitat arnat qulingiluanngorput angutillu arfineq-pingasunngorlutik.

Zapatero qineqqusaarutimik aamma taamaalilluni piviusunngortitsivoq, tassami suiaassuseq tunngavigalugu immikkoortitsisarnerit aamma allatut isumalinnik akaarinninnginnerit uumisaarisarnerillu unitsissallugit qineqqusaarnermini neriorsuutigisimavaa.