Spaniami aningaasarsiornikkut kinguariartorneq suli atuuppoq
Mallorcami aasaanerani sunngiffeqarnini kunngip sivikillisariaqarsimavaa siornatigullu pinikuunngisaannartumik sunngiffeqarnermi ingerlanerani kunngip umiarsuaanik marloriaannarluni angalaarsimalluni.
Europami aningaasarsiorfiunerpaasuni marluusuni, Tysklandimi Frankrigimilu, aningaasarsiorneq siumut aallareeraluartoq Spaniami suli aningaasarsiornikkut unittooqqasoqarpoq. Spaniamiut aningaasaqarnermut naalakkersuisuat Elena Salgado, nunat G20-nik taaneqartartut aqagumiit arfininngorneq ilanngullugu Londonimi, nunarsuarmi nunat 20-t aningaasarsiornerpaasut aningaasarliornermik qanoq qaanngiiniarsimanerat pillugu eqqartuillutik ataatsimiinnissaanni peqataasunit ernummateqarnerpaassasoq naatsorsuutigineqarpoq.
Nunani euro-mik atuiffiusunit arlalinnit Spania aningaasarliornermik aningaasarsiornikkullu kinguariartornermik aatsaat ukiumik ataatsimik kingulliulluni qaanngiissasoq immikkut ilisimasalinnit allaat naatsorsuutigineqarpoq.
- Aningaasaqarneq assut sukkasuumik nakkaakkiortornikuuvoq maannali qummut aallarniarnitsinni aqqut sakkortooq atortariaqarparput, spaniamiut aningaasaqarnemut naalakkersuisuat oqarpoq.
Spaniami aningaasaqarnerup EU-mi ilaasortaasunut nunanut allanut sanilliullugu ajornarnerusumik siumut aallarteqqinniarnera siullertut pingaarnertullu aaqqissuussaanikkut ajornartorsiornermit aallaaveqarpoq. Spaniap aningaasaqarniarnera tunisassiornerup appasinneranit sunnigaaqqavoq tamannalu avammut niuernermut sunniuteqarpoq taamaammallu Spaniamiut suliffeqarfiutaasa assersuutigalugu tyskit suliffeqarfiutaattut, Aasiami niuffaffiit ingerlalluaqqilernerat iluaqutigisinnaanagu.
