Sorsunnersuup nalaani pisunut toqqorsivissuaq ammarneqalerpoq
Oqaluttuarisaaneq pillugu ilisimatuut Nazisteqarnerup nalaani pisut pillugit oqaluttuarpassuarnut toqqorsivissuarmut Tysklandimiittumut iseqqusaasinnaanngungajalerput.
Taamani sorsunnersuup aappaani inuppassuit millionikkaat inussiatut nazistinit sulisitaapilunnerannit pisut isertugaatigineqarsimagaluarput. Toqqorsivissuarmullu tassunga inuit akuerisaasuinnaat kisimik iseqqusaasarsimagaluarlutik.
Tysklandimi illoqarfiit ilaanni oqaluttuarisaanermut tunngassuteqartunut toqqorsiverujussuaq 30-niit 50 millionit tungaanut amerlatigisunik nazistit nalaanni pisunik uppernarsaatissanik toqqortaateqarpoq.
Ukiut kingulliit 20-t ingerlaneranni Tyskit nunanit allanit ingammik Amerikamiunit kimigiiserfigineqartuarsimapput toqqorsivissuup ilisimatuunut oqaluttuarisaanermullu sammisaqartunut ammaanneqarnissaanik noqqaasunit.
Tyskilli tamanna perusuttarsimanngilaat eqqissisimatitaanissaq angorusunnerartarlugu.
Maannali Tyskit inatsiseqarnermut ministeriata Brigitte Zybriasip ukiut aappata qeqqata ingerlanerani toqqorsivissuup ilisimatuunut ammaanneqarnissaa ilisimatitsissutigeqqammerpaa.
Tamanna Uffe Østergaardip sorsunnersuup aappaani toqoraasoqarsimanera pillugu nunat tamalaat ilisimatusarneranni pisortaasup danskiusup nuannaarutigeqaa.
- Inuppassuit sorsunnersuup aappaani tammarsimasut kikkorpiaanerat paaserusuttaraluarparput, soorlu qanorpiaq ilillutik tammarsimanerat toqutaasimanersut tammaannarsimanersulluunniit paasilluarusullutigu.
Toqqorsivissuarlu taannaavoq akissutissanik tamakkuninnga peqarnerpaajusoq, Uffe Østergaard oqarpoq.
Nunat tamalaat rødekorsiat toqqorsivissuarmut iseqqusaasut ikittuinnaat akornanni isersinnaasut ilagaat. Rødekorsi ukiumut inunnit 150.000-nik qinnuteqarfigineqartarpoq ilaquttatik taamani toqutaasimasut qanorpiaq ilillutik toqutaasimanerannik paasisaqarusuttunit.
Amerikamiuttaaq toqqorsivissuup ammarneqarnissaa nuannaarutigeqaat kiisami uppernarsaatissanik nassaartoqarsinnaalissammat, toqqorsivissuullu ammarneqartussanngornera ileqqorissaarnertut isigigitsik unnerlugu.
