Sorsunnersuarmit siullermit akiitsut nungunneqarput
Aviisi "Der Nordschleswiger" Aabenraamit saqqummersinneqartartoq taama allappoq.
Illoqarfimmi Versailles-imi eqqisseqatigiinissaq anguniarlugu, 1919-mi isumaqatigiittoqarnerani, Tyskland-ip taarsiinissaanut piumasaqaat isumaqatigiissutigaa.
Sorsunnersuulli aappa aallartimmat, Adolf Hitlerip taarsersuineq unitsippaa.
Aatsaalli 1953-mi London-imi isumasioqatigiinnermi aalajangerneqarpoq, sorsunnersuarmi siullermi aseruatitikkanut, Tyskland taarsersuileqqissasoq, taarsersugassaasalu saniatigut erniat erniaat aamma ilanngullugit taarserneqasassasut isumaqatigiittoqarluni. Tassalu taarsersugassat katillugit 240 million D-mark-iulerlutik.
Sorsunnersuup aappaata kinguneranik taarsersugassat 1988-mi akilersorneqarneri naammassipput, tassalu sorsunnersuup siulliup piliaanik taarsersugassat, ukiut 92-it qaangiutillartullu, aatsaat ulluni makkunani naammassineqarlutik.
Sorsunnersuup siulliup nalaani amerikamiut præsidentiata, Woodrow Wilson-ip piumasaraa Tyskland aserukkaminut taarsersuissasoq. Aammattaaq Wilsonip suliniuteqarneratigut, inunnillu taasisitsineratigut, Danmarkip Tyskland-illu killeqarfiat 1920-mi aalajangerneqarpoq.