Sorsunnermi iloqianngortut Nunatsinni sisoraaserlutik angalalersut

Danskit sakkutuui sorsunnermi ajoqusersimasut Tunuliarlutik ataasinngorpat aallassapput, qaammatillu tulliani 30-nik issittoq kilometerit 400-t ingerlaassallutik.

Amerlanerit sisoraaserlutik ingerlaassapput, peqataasulli marluk qaartoornikkut niutik annaasimavaat qamuteeqqanillu ingerlaassallutik.

Sisoraaserlutik ingerlaartussat ilagaat Tønderimeersoq 28-nik ukiulik Christian Alexander Lanz. Taanna sakkutuut ingeniøriini gruppeføritut Afghanistanimut 2012-imi tikillatsiaannarluni aallaatippoq.

Nunap immikkoortuani Helmandimi qaqqajunnap qaavani nalatilluni aallaatippoq, aqerlorlu perneratigoorluni timaani ingerlaarpoq qiteraa timaatalu atortui ajoquserneqarlutik.

Taamaammat Christian Lanz, peqataasut allat assingalugit, ullut tamaasa anniaateqartarpoq.

Sooruna taama ajoqusersimallusi angalaniarpisi?

- Ajoqusersimagaluarluta suli pisinnaallut,a annertuunillu naammassisaqarsinnaalluta takutikkusukkatsigu.

- Danskinut nalinginnaasumik, aammalu ajoqusersimasunut allanut paasititsiniutaassaaq. Innarluuteqaraluarluni qanoq naammassisaqartoqarsinnaatiginersoq taamaalillutik takusinnaaniassavaat, Christian Lanz taama oqarpoq.

Kalaallit Nunaannukarnissaq ilinnut qanoq pingaaruteqartigiva?

- Angalanissaq imaannaanngitsuuvoq uannullu annertuumik ineriartuutaassalluni. Ajoqusersimalluni susinnaajunnaarsimasutullu misigisimasinnarluni ulluni 30-ni paasisassarsiorluni angalanissaq imaannaanngitsuuvoq.

- Iluatsissagukkulu, angerlaruma sunaluunniit sapernavianngilara.

Sakkutuuiarnerit sorsunnermi ajoqusersimasut saniatigut aamma Siriusip alapernaarsuisuneersut, sakkutuut immikkut sungiusakkat assigiinngitsut, timimik sungiusaasoq, timimut iluaqusersuusiortoq timersornermilu siunnersorti paasisassarsioqataassapput.

Paasisassarsiorlutik angalasut aamma piviusulersaarummik filmiliortunik angalaqateqassapput.

Angalasussat Aalborgimit ataasinngormat ullaakkut aallassapput.

/ritzau/