Sorsunneq nillertoq sakkortuseqqeriaannaavoq

Amerikamiut nunanut allanut ministeriata Russit Præsidentiat aamma Illersornissamut ministeriat ataatsimeeqatigisareerlugit isummatik imminnut ungasissorujussuunerarpai. Putin-i mianersoqqusivoq, USA-p soqutigisaqarani pilersaarutini piviusunngortinniassappagit, nunammi taakku marluk akornanni pissutsit innarlerneqariaannaammata.

Polenimi narsaamaninnguami arsaattarfittut atsigisumi rakettit qulit inissinniarneqarnerisa taamak qassiiliuutaatigilersinnaanerata takutippaa Ruslandip USA-llu akornanni pissutsit qanoq qajannartigisut. Nunat killiit sakkulersorniarnerannut aallarniutaannartut rakettinik inissiiniarneq Russiniit isigineqarpoq. Nunaniit soorlu Iranimiit misiilinik igeriussanik nakkartitsiniutissatut rakettit sillimmatiginiarlugit USA nalunaaraluartoq,

Ruslandi aarlerivoq.

Tjekkiamilu radareqarfiliassap, nunani pinerliiniani pisut kisiisa pinnagit Ruslandimili aamma pisut alaatsinaanneqarnerannut atorneqartussatut pasivaat. Vladimir Putinip mianersoqqusineranut pissutaasut ilagaat russerpassuit isumaqarnerat Putin-ip siulia, Boris Jeltsin, nunanut killernut tunniusimavallaarsimasoq. Putin periarfissanik allanik siunnersuuteqarpoq, soorlu radareqarfik Aserbajdsjanimiittoq, allalu Ruslandip kujataaniittoq atorneqarsinnaasut unnerlugit. Amerikamiulli isumaqarput radareqarfiit taakku Tjekkiamiittussamut taarsiunneqarsinnaanngitsut sillimanissamulli ikiuutaalluarsinnaasut. Amerikamiut nunanut allanut ministeriat, Condoleeza Rice, manngertitaarpoq, oqarluni pilersaarutitik allanngortinneqassanngitsut, rakettillu Polenimi ukiut sisamat qaangiuppata inissinneqassasut. Rice-lli Russit isumaqatiginiartuarumavai, allarpassuartigut isumaqatigiinnissartik pisariaqarmat, soorlu Iranimut Kosovomullu tunngasuni.

NAGGASIUT:DR-imiit ilanngutassiaq Ulf Fleischerimit kalaallisuunngortinneqarpoq.