Sorsunneq Nillertoq Ruslandip aallartinniarpaa

Qaartartunut ungasissumiit igeriuttakkanut illersuusiamik sananissamut amerikamiut pilersaarusioruttulersut, sorsunnermik nillertumik aallartitseqqinniarluni Ruslandip sioorasaarutigaa.

Ruslandimi naalakkersuisut oqaaseqartartuat oqarpoq, qaartartunut illersuusiamik Europami inissisimasussamik USA-p sananialersaarnera, Ruslandip qanoq ililluni illuatungilersinnaaneraa Kremlimit eqqarsaatigineqartoq. Aviisi Politiken malillugu The Guardian taama allappoq.

Russit qanorpiaq pilersaaruteqarnerlutik suli saqqummiutinngilaat, Kremlimiilli tusakkat imaapput, USA-p iliuusai killuussinerusut.

- Assut ernumatsappugut ajuallallutalu. Pilersaarutit taakku pillugit siumut ilisimatinneqarsimanngisaannarpugut, naalakkersuisut oqaaseqartartuisa qullersaat, Drimitry Peskov, oqarpoq.

Taannali aamma oqarpoq, Putinip USA oqaloqatigalugulu isumaqatigiissuteqarfigilersaaraa.

Danskerli Ruslandimi pissutsinik ilisimaarinnilluartoq, Jørgen Staun, isumaqarpoq, pilersaarutinik tusatsiakkat piviusorsiornatik politikimut attuumassuteqarnerusut.